Boltinn hjá stjórnvöldum

Lífeyrissjóðirnir, sem eru að skoða möguleikana á að stofna sérstakan Fjárfestingasjóð Íslands, eru reiðubúnir að fjárfesta í einkaframkvæmd og sjálfbærum framkvæmdum eða veita lán til þeirra. Þjóðhagslegur ávinningur af slíkum framkvæmdum verður jafnframt skoðaður. Hefðbundnar ríkisframkvæmdir sem eru á fjárlögum eru tæplega inni í myndinni.

Þetta kom fram á fyrsta formlega fundi stjórnvalda og aðgerðahóps lífeyrissjóða sem haldinn var í gær.

„Við erum tilbúnir að skoða verkefni en fyrst þurfa stjórnvöld að finna út hvaða verkefni geta uppfyllt það sem menn eru að tala um,“ segir Arnar Sigurmundsson, formaður stjórnar Landssamtaka lífeyrissjóða og aðgerðahópsins.

Að sögn Arnars komu til tals á fundinum framkvæmdir sem nefndar voru fyrr í sumar, eins og nýbygging á Landspítalalóðinni samkvæmt nýjum hugmyndum, Búðarhálsvirkjun, Vaðlaheiðargöng, Suðurlandsvegur, tvöföldun vegar í Kollafirði, tvöföldun Hvalfjarðarganga og samgöngumiðstöð á Reykjavíkurflugvelli.

„Það var minnst á allar þessar framkvæmdir á fundinum. En boltinn er hjá stjórnvöldum. Það er þeirra að velja þau verkefni sem við tökum til skoðunar. Svo kemur í ljós hvort mögulegt er að ná lendingu. Þetta byggist fyrst og fremst á því að búið sé þannig um hnútana að öryggið framundan sé eins mikið og hægt er að hugsa sér ef um lán er að ræða og hugsanlega fjárhagslega aðkomu,“ segir Arnar.

Hann getur þess að lífeyrissjóðirnir séu enn reiðubúnir að setja um 100 milljarða króna í opinberar framkvæmdir og til stofnunar Fjárfestingasjóðs Íslands á næstu fimm árum, eins og fram kom fyrr í sumar.