Maður handtekinn vegna sprengjuhótunarinnar

„Við höfum handtekið einn mann sem er sterklega grunaður um að hafa hringt inn hótunina. Við munum yfirheyra hann síðar í dag,“ segir Geir Jón Þórisson, yfirlögregluþjónn.

Geir Jón segir að maðurinn, sem er um tvítugt, hafi verið handtekinn í heimahúsi í Hafnarfirði um klukkan hálfþrjú vegna sprengjuhótunar í Borgarholtsskóla. Maðurinn er ekki nemandi í skólanum en tengist nemanda. Geir Jón segir að fleiri séu ekki grunaðir um aðild að hótuninni.

Samkvæmt upplýsingum frá lögreglu hefur maðurinn komið áður við sögu lögreglunnar. Ekki hefur reynst unnt að yfirheyra manninn vegna ástands hans. 

Eins og fyrr segir barst sprengjuhótun í Borgarholtsskóla í hádeginu. Skólinn var þegar rýmdur og svæðið umhverfis hann girt af. Eftir ítarlega leit var ljóst að engin sprengja var innandyra og því var um gabb að ræða.

Hótun barst gegnum síma. Sagt var að rýma þyrfti skólann strax annars annars yrðu afleiðingarnar mjög alvarlegar. fjölmennt lið lögreglu, sjúkraflutningamanna og slökkviliðs var sent að skólanum. Þá var sprengjuleitarsveit Landhelgisgæslunnar kölluð til og leitaði hún að sprengju í skólanum en fann enga.

Borgarholtsskóli er lokaður og verður lokaður í dag. Nemendur þurftu að rýma skólann í skyndi og skildu eftir skó, skólatöskur og fleira.

• 2 blogg um fréttina

Bloggað um fréttina

• Jakobína Ingunn Ólafsdóttir: Samfélag í upplausn
• Einar Guðjónsson: Hlýtur að vera unglingur