Hálfkaraðar glæsihallir

Lítið hefur gerst á lóðum nýbygginga við Valhallarstíg á Þingvöllum út ári eftir að Mbl sjónvarp greindi frá gríðarmiklum framkvæmdum þar.

Í júlí í fyrra fluttu þyrlur og fjórhjól fluttu aðföng til glæsibyggingar Ágústs Guðmundssonar sem var í smíðum á Valhallarstíg en framkvæmdagleðin var slík að aðrir íbúar kvörtuðu eða flúðu bústaði sína undan hávaða.

Bogi Pálsson var einnig að byggja í júlí í fyrra eins og hér sést en það er líklega tímanna tákn að nýjar framkvæmdir við Valhallastíg hafa nánast staðið í stað.

Nú bregður svo við að kvartað hefur verið til þjóðgarðsins vegna þess að engar framkvæmdir eru á lóðunum en  byggingarefnið er þar hinsvegar enn.

Ný Þingvallanefnd tekur til starfa á fimmtudag. Sú eldri  kynnti eigendum sumarhúsalóða innan þjóðgarðsins á Þingvöllum drög að nýjum reglum um sumarhús í fyrra. Þar er lagt bann við nýbyggingum og girðingum um einkalóðir. Ný Þingvallanefnd verður meðal annars  að ákveða hvort lóðarleigusamningar sem eru að renna út í þjóðgarðinum verða framlengdir eða ekki.

Þá  er einnig verulega umdeilt hvort það verður byggt hótel eða veitingahús í stað Hótels Valhallar sem brann í sumar en það kemur meðal annars í hlut nýrrar Þingvallanefndar að skera úr um það.