Stal lambalærum úr verslun

Mikið hefur verið um þjófnaði úr verslunum um helgina. Meðal annars var karlmaður á fimmtugsaldri   handtekinn í Reykjavík eftir hádegi í gær en maðurinn stal þremur lambalærum úr matvöruverslun.

Síðdegis í gær var kona á þrítugsaldri handtekin í matvöruverslun í Hafnarfirði en hún stal seðlaveski af viðskiptavini verslunarinnar. Konan reyndist hafa ýmislegt fleira á samviskunni og þykir víst að hún hafi farið í nokkrar ránsferðir um helgina.

Önnur kona, sem er á fertugsaldri, var handtekin fyrir þjófnað í verslun í Kópavogi. Talið er að hún hafi haft sama háttinn á en konan er grunuð um að hafa stolið bæði fatnaði og snyrtivörum úr nokkrum verslunum.

Í Smáralind voru þrjár unglingsstúlkur gómaðar en þær höfðu þá stolið fatnaði úr þremur verslunum. Þrír unglingsspiltar voru staðnir að hnupli í verslun í miðborginni og tveir jafnaldrar þeirra voru teknir í austurborginni, en þeir voru líka að stela úr verslun.

Á öðrum stað í borginni fór par á miðjum aldri út úr matvöruverslun með innkaupakerru fulla af mat án þess að greiða fyrir hann. Í Smáralind reyndu þrír karlar og ein kona að stela vörum úr tveimur verslunum en afgreiðslufólkið sá við þeim og endurheimti vörurnar.

• 1 blogg um fréttina

Bloggað um fréttina

• Jóhannes Ragnarsson: Gamla konan sem braust inn hjá nágrönnum sínum