Óskar eftir frekari upplýsingum

Umhverfisráðherra mun á næstu dögum óska eftir frekari upplýsingum vegna skipulagstillögu Skeiða- og Gnúpverjahrepps. Það er gert í ljósi úrskurðar samgönguráðuneytisins um að Flóahreppi hafi ekki verið heimilt að semja við Landsvirkjun um greiðslu kostnaðar vegna skipulagsvinnu sveitarfélagsins.

Þetta kemur fram í tilkynningu frá umhverfisráðuneytinu.

Þar segir að ráðuneytið hafi til skoðunar skipulagstillögu vegna breytinga á aðalskipulagi Skeiða- og Gnúpverjahrepps sem sveitarfélagið hafi óskað staðfestingar umhverfisráðherra á.

Í rammasamkomulagi milli sveitarstjórnar Skeiða- og Gnúpverjahrepps og Landsvirkjunar varðandi undirbúning, byggingu og rekstur Hvamms-, Holta- og Urriðafossvirkjunar segi:

„Landsvirkjun mun greiða allan sameiginlegan útlagðan kostnað sveitarfélagsins vegna undirbúnings virkjana s.s. kostnað vegna skipulagsbreytinga og vinnu við útgáfu framkvæmdaleyfisins. Komi til ófyrirséða atvika á verktímum virkjananna, sem leiða munu til útgjaldaauka sveitarfélagsins munu aðilar hafa samráð um greiðslu þess kostnaðar.“

Fram kemur í tilkynningu ráðuneytisins að að vissu leyti sé um sambærilegt tilvik að ræða og í úrskurði samgönguráðuneytisins í dag og því þyki ástæða til að skoða málið nánar.

• 5 blogg um fréttina

Bloggað um fréttina

• S i g u r ð u r S i g u r ð a r s o n: Hver er sök Landsvirkjunnar?
• Gísli Már Marinósson: Draugar.
• Stefán Friðrik Stefánsson: Hvað varð um Svandísi Svavarsdóttur?
• GRÆNA LOPPAN: Landsvirkjun skekkir myndina vísvitandi
• Einar Guðjónsson: Óþarfi að vera með ráðherra