Innlent | mbl | 7.9.2009 | 9:09

Frestur til að skoða rúmlega 6600 ökutæki að renna út

mbl.is/Golli

Umferðarstofa vekur athygli á því að 1. október n.k. mun sýslumaðurinn í Bolungarvík leggja vanrækslugjald á eigendur húsbíla, bifhjóla og ferðavagna sem ekki hafa farið með þá til skoðunar fyrir þann tíma. Ferðavagnar eru tjaldvagnar, fellihýsi og hjólhýsi.

Samkvæmt tölum Umferðarstofu frá 4. september eru 5095 ferðavagnar, 1331 bifhjól og 253 húsbílar enn óskoðaðir af þeim ökutækjum sem færa þarf til skoðunar á þessu ári. „Þessi mikli fjöldi óskoðaðra bifhjóla vekur athygli en þetta er u.þ.b. 13% allra skráðra bifhjóla í landinu. Verði ökutækin ekki færð til skoðunar fyrir 1. október mun sýslumaðurinn í Bolungarvík leggja vanrækslugjald á þau. Tekið skal fram að ekki þarf að færa ferðavagna sem eru skráðir árið 2006 eða seinna til skoðunar á þessu ári. Þá eiga áðurgreindar tölur eingöngu við um húsbíla og bifhjól sem koma eiga til skoðunar á árinu 2009,“ segir í tilkynningu frá Umferðarstofu.

Á síðasta ári tók gildi ný reglugerð um skoðun ökutækja en fram að því hafði ekki verið skylt að færa ferðavagna til skoðunar. Vegna mikils fjölda slíkra vagna á vegum landsins og mikilvægi þess að ástand þeirra og öryggisbúnaður sé í lagi voru settar reglur um skoðun þeirra byggðar á tilskipun Evrópusambandsins.

Þann 1. ágúst 2009 átti að vera búið að færa ferðavagna, hjólhýsi og bifhjól sem voru skráð árið 2005 eða fyrr til skoðunar en eigendur ökutækjanna hafa þó frest fram til 1. október til að færa þau til skoðunar áður en vanrækslugjald verður lagt á. Á næsta ári þarf að færa ferðavagna sem eru skráðir 2006 til skoðunar fyrir 1. ágúst en eigendur hafa síðan tvo mánuði upp á að hlaupa áður en vanrækslugjaldið leggst á þann 1. október.

Umferðarstofa vill hvetja eigendur húsbíla og bifhjóla sem koma eiga til skoðunar á þessu ári ásamt ferðavögnum af árgerð 2005 eða eldra til að færa vagnana til skoðunar fyrir 1. október svo komist verði hjá álagningu vanrækslugjalds.