Innlent | mbl | 8.9.2009 | 9:02

Laun hækkuðu milli ársfjórðunga

Laun í byggingariðnaði hafa lækkað á árinu.

Regluleg laun voru að meðaltali 0,15% hærri á öðrum ársfjórðungi en á þeim fyrsta. Á sama tímabili hækkuðu laun á almennum vinnumarkaði um 0,23% að meðaltali en laun opinberra starfsmanna lækkuðu um 0,04%. Frá fyrra ári hækkuðu laun um 3,6%, þar af um 1,2% á almennum vinnumarkaði og um 9,5% hjá opinberum starfsmönnum.

Þetta kemur fram í úttekt Hagstofunnar. Frá fyrri ársfjórðungi hækkuðu laun verkafólks mest eða um 0,5% en laun iðnaðarmanna lækkuðu á sama tímabili um 0,2%. Frá fyrra ári hækkuðu laun skrifstofufólks mest eða um 4,4% en laun stjórnenda lækkuðu hins vegar um 3,3% á sama tímabili.

Frá fyrri ársfjórðungi mældist hækkun launa í iðnaði 0,5%. Á sama tímabili lækkuðu laun í byggingarstarfsemi og mannvirkjagerð um 1,1%. Frá fyrra ári hækkuðu regluleg laun mest í iðnaði um 3,4 % en laun í fjármálaþjónustu, lífeyrissjóðum og vátryggingum lækkuðu um 1,3% á sama tímabili.

Samkvæmt ákvörðun Kjararáðs frá 10. mars 2009 lækkuðu regluleg heildarlaun dómara um 5-15% frá 15. mars 2009. Í samkomulagi Félags prófessora við ríkisháskóla og fjármálaráðherra f.h. ríkisjóðs, sem undirritað var þann 26. september 2008, var kveðið á um greiðslu sérstaks álags vegna gildistöku nýrra háskólalaga. Ákvæði samkomulagsins gilti frá 1. september 2008 til 31. mars 2009, en frá þeim tíma féllu fyrrgreindar álagsgreiðslur niður.