Bjóða lóðir á lágum vöxtum og lengja byggingartíma

„Fram að hruni var eftirspurn eftir lóðum meiri en framboðið. Nú hefur þetta snúist við. Því erum við hjá borginni að setja okkur í nýjar stellingar og á margan hátt er þessi tími ágætur ef hefja skal framkvæmdir,“ segir Óskar Bergsson, formaður borgarráðs.

Reykjavíkurborg hefur auglýst eftir umsóknum um lóðir í Úlfarsárdal og við Reynisvatnsás, það er fyrir einbýlis-, par-, rað- og fjölbýlishús. Verð á byggingarrétti er óbreytt frá því sem var haustið 2006, en þá lækkaði lóðaverð þegar fallið var frá svonefndri útboðsleið.

„Átak í lóðamálum er meðal þeirra möguleika sem við höfum til þess að koma hjólum atvinnulífsins af stað á nýjan leik,“ segir Óskar, sem vekur athygli á að lóðahafar geti greitt 85% af verði byggingarréttar með 8 ára verðtryggðu veðskuldabréfi, sem ber 4,0% vexti.

Borgaryfirvöld hafa einnig lengt framkvæmdafrest frá því sem áður var viðmið. Nú er gerð krafa um að hús sé fokhelt innan fjögurra ára í stað tveggja ára og segir Óskar hugsunina þá að húsbyggjendur hafi meira svigrúm til að haga framkvæmdum eftir sínum aðstæðum.