Innlent | mbl | 17.9.2009 | 17:24 | Uppfært 20.12.2009 14:17

Óska eftir trúnaði

Jóhanna Sigurðardóttir og Steingrímur J. Sigfússon ræddu við fjölmiðla nú síðdegis mbl.is/Ómar

Bretar og Hollendingar hafa óskað eftir því að þær hugmyndir sem þeir hafa um fyrirvara vegna Icesave-samkomulagsins verði meðhöndlaðar sem trúnaðarmál á þessu stigi. Forsvarsmenn ríkisstjórnarinnar hafa í dag fundað með leiðtogum stjórnarandstöðunnar og kynnt þeim stöðu málsins.Þetta kemur fram í tilkynningu frá ríkisstjórn Íslands.

„Fulltrúar íslenskra, breskra og hollenskra stjórnvalda hafa verið í sambandi undanfarnar vikur í kjölfar samþykktar l. nr. 93/2009 um ríkisábyrgð á lánum til Tryggingarsjóðs innstæðueigenda og fjárfesta.

Af hálfu Breta og Hollendinga hafa komið fram hugmyndir um hvernig þeir geti fyrir sitt leyti lokið málinu með hliðsjón af fyrirvörum Alþingis. Þeir hafa óskað eftir því að þessar hugmyndir verði meðhöndlaðar sem trúnaðarmál á þessu stigi.

Forsvarsmenn ríkisstjórnarinnar hafa í dag fundað með leiðtogum stjórnarandstöðunnar og kynnt þeim stöðu málsins og munu funda með fjárlaganefnd kl. 18 í dag," að því er segir í tilkynningu.