Innlent | mbl | 18.9.2009 | 18:29

Segja stjórnvöld leyna Icesave-gögnum

Samtökin InDefence segja að íslensk stjórnvöld hafi ítrekað gerst sek um að leyna þjóðinni mikilvægum upplýsingum um Icesave málið og geri sig enn sek um að sveipa viðræður um Icesave málið við Breta og Hollendinga leyndarhjúpi. Krefjast samtökin þess að öll gögn um málið verði birt.

„Ríkisstjórnin tilkynnti í gær, þann 17. september 2009, að viðbrögð hefðu borist frá Bretum og Hollendingum um þá fyrirvara sem Alþingi gerði við ábyrgð á Icesave skuldbindingunni. Viðbrögðin eru sögð vera óformleg og eru bundin leynd. Rök fjármálaráðherra fyrir leynd eru fjarstæðukennd, þ.e.a.s. að hún sé vegna þess að ef „þessar hugmyndir eru ekki grundvöllur frekari vinnu þá hverfi þær og hafa aldrei verið til”.

InDefence hópurinn lýsir bæði furðu og áhyggjum yfir því að íslensk stjórnvöld geri sig aftur sek um að sveipa viðræður um Icesave málið við Breta og Hollendinga leyndarhjúpi eftir það sem undan er gengið. Það skiptir engu máli hvort íslensk, bresk eða hollensk stjórnvöld skilgreini þessi viðbrögð sem óformleg. Ef þau eru rædd í íslenskum þingnefndum eru þau ekki bara orðin formleg, heldur varða þau beinlínis við þjóðarhag. Þjóðin á skýlausan rétt á að sjá öll viðbrögð Breta og Hollendinga við fyrirvörum Alþingis," segir í yfirlýsingu samtakanna.

Þau segja, að íslensk stjórnvöld hafi ítrekað gerst sek um að leyna þjóðinni mikilvægum upplýsingum um Icesave málið. Skemmst sé að minnast þess að ekki einu sinni alþingismenn hafi átt að fá að sjá Icesave samningana á sínum tíma vegna trúnaðar um efni þeirra. Þá hafi leyndin þjónað hagsmunum Breta og Hollendinga, enda hafi samningarnir gerbreyst Íslendingum í hag í meðförum Alþingis með setningu fyrirvaranna.

„Hagsmunum hverra þjónar leyndin nú? Ekki íslensku þjóðarinnar, svo er víst. Því miður glötuðu íslensk stjórnvöld stórum hluta af trausti þjóðarinnar vegna framgöngu þeirra í Icesave málinu. Þetta traust þurfa þau að vinna aftur með góðum og gegnsæjum vinnubrögðum og með því að hafa þjóðina með í ráðum og birta öll gögn vegna Icesave málsins," segir í yfirlýsingunni.