Illmögulegt að leigja ýsukvóta

Þriðjungs niðurskurður veiðiheimilda í ýsu er farinn að segja til sín og segja talsmenn smábátaeigenda nánast ómögulegt að fá leigðan ýsukvóta, öfugt við það sem hefur verið undanfarin ár þegar nægt framboð var.

Ýsukvótinn á nýliðnu fiskveiðiári var 93 þúsund tonn en samkvæmt ákvörðun sjávarútvegsráðherra er kvóti nýhafins fiskveiðiárs 63 þúsund tonn. Niðurskurðurinn frá fyrra ári er 30 þúsund tonn.

Afleiðingar þessa eru margvíslegar að sögn talsmanna smábátaeigenda, m.a. fyrir þá sem leigt hafa til sín ýsu á undanförnum árum. Margir þeirra eru með nægar veiðiheimildir í þorski en standa nú frammi fyrir því að geta ekki nýtt sér þær þar sem ýsa fæst alltaf með þorskinum.

Einnig hefur þetta þær afleiðingar að framboð á línuveiddri ýsu minnkar og þar með útflutningsverðmæti þar sem minna fæst fyrir ýsu sem veidd er í troll.

Í þriðja lagi segja smábátasjómenn að þetta komi niður á þorskveiðunum, þær ekki sé hægt að stunda þær með eins mikilli hagkvæmni og verið hefur.

Landssamband smábátaeigenda hefur rætt þessi mál við sjávarútvegsráðuneytið og mun á næstu dögum, ef engar breytingar verða á, senda Jóni Bjarnasyni sjávarútvegs- og landbúnaðarráðherra hugmyndir til umræðu um hvernig megi liðka til með viðskipti með veiðiheimildir á ýsu.

Krókaaflamarksbátar leigðu til sín yfir fjögurþúsund tonn

Heildarýsuafli síðast liðins fiskveiðiárs varð rúm 89 þúsund tonn. Hlutur krókaaflamarks í þeirri tölu var 21 þúsund tonn eða 24% heildaraflans.

Hlutdeild þeirra í ýsunni er hins vegar 15%. Mismunurinn hefur komið með því að leigja til sín úr aflamarkskerfinu og flutningi milli ára, en alls bættu þeir við sig á fimmta þúsund tonnum eða rúmlega fjórðungi við útgefnar aflaheimildir í ýsu á sl. fiskveiðiári með því að leigja veiðiheimildir af stærri skipum.

Vefur Landssambands smábátaeigenda

• 3 blogg um fréttina

Bloggað um fréttina

• Níels A. Ársælsson.: Kvótakerfið gengið sér til húðar
• Jakob Falur Kristinsson: Ýsukvóti
• Hallgrímur Guðmundsson: Klöppum fyrir kerfinu...