Innlent | mbl | 23.9.2009 | 18:03 | Uppfært 18:18

Ræða um greiðsluvanda heimila

Ríkisstjórnin hefur oft fundað með aðilum vinnumarkaðar á undanförnum mánuðum.

Forustumenn Alþýðusambands Íslands og Samtaka atvinnulífsins sitja nú á fundi með ráðherrum ríkisstjórnarinnar í Ráðherrabústaðnum. Á fundinum ætla forustumenn ASÍ m.a. að kynna ráðherrum tillögur, sem samþykktar voru á miðstjórnarfundi í dag um leiðir til að taka á greiðsluvanda heimilanna.

Umræður fóru einnig fram um stöðu atvinnumála á fundi miðstjórnar ASÍ í dag og komu þar fram miklar áhyggjur af þeirri óvissu sem uppi er um orkunýtingu í Þingeyjarsýslu og fyrirhugað álver á Bakka.

Innan launþegahreyfingarinnar eru menn á einu máli um að aðgerðir sem samkomulag varð um við gerð stöðugleikasáttmálans gangi mjög hægt fyrir sig. Það styttist í endurskoðun kjarsamninganna 1. nóvember.

Þó viðmælendum á vinnumarkaði og innan lífeyrissjóðanna beri saman um að nokkur hreyfing sé komin á viðræður um verklegar stórframkvæmdir liggur enn ekkert fyrir um hvaða verk verða fyrir valinu. Undirhópar eru að störfum en upphaflega var sett það mark að viðræðunum yrði lokið 1. september.

Þá er í stöðugleikasáttmálanum skýrt kveðið á um að engar hömlur skuli vera í vegi fyrir nýjum fjárfestingum í atvinnulífinu 1. nóvember.

„Menn þurfa að taka sig verulega á ef klára á öll þessi mál,“ sagði Vilhjálmur Egilsson, framkvæmdastjóri Samtaka atvinnulífsins, í Morgunblaðinu í dag. „Við gengum algjörlega út frá því að stýrivextirnir yrðu komnir í eins stafs tölu 1. nóvember og að vaxtastig hefði lækkað samsvarandi. Sú áætlun sem Seðlabankinn lagði fram um gjaldeyrishöftin er afar metnaðarlítil. Það sýnir sig að þau fara algerlega eftir kennslubókinni og virka alls ekki.“