78% grunnskólabarna læra ensku

Enska er fyrsta erlenda tungumálið í grunnskólanum og jafnframt það tungumál sem flestir grunnskólanemendur læra. Skólaárið 2008-2009 lærðu 33.974 börn ensku í grunnskólum og hefur þessi tala ekki verið hærri frá því Hagstofan hóf að birta tölur um fjölda barna sem læra erlend tungumál árið 1999. Lætur nærri að 78% grunnskólabarna læri ensku.

Hagstofan segir, að í sífellt fleiri grunnskólum hefjist kennsla í erlendum tungumálum fyrr en kveðið er á um í aðalnámskrá grunnskóla. Síðastliðið skólaár voru 7335 börn í 1.-4. bekk að læra ensku eða 44% barna á þessum aldri (6-9 ára). Fyrir fimm árum, skólaárið 2003-2004, lærðu aðeins 484 börn í þessum bekkjum ensku, eða 2,8%.

Nemendur hefja nú flestir dönskunám í 7. bekk, eða við 12 ára aldur. Í mörgum skólum geta nemendur sem hafa kunnáttu í norsku eða sænsku valið þau tungumál í stað dönsku. Á síðastliðnu skólaári lærðu 230 börn sænsku frekar en dönsku og 94 börn lærðu norsku. Ekki hafa fleiri börn verið í sænskunámi síðan haustið 2001. Virðist sem norskunemum fari fækkandi og mælast þeir í fyrsta skipti innan við eitt hundrað.

Fækkar í spænskunámi 

Undanfarin ár hefur nemendum sem læra spænsku fjölgað ár frá ári en að sögn Hagstofunnar ber nú svo við að þeim fækkar í fyrsta skipti og voru 455 síðastliðið skólaár, en voru 548 skólaárið á undan. Þetta er fækkun um 93 nemendur eða 17%.

Nemendum í þýsku og frönsku fer líka fækkandi. Þýskunemum hefur fækkað ár frá ári frá því að þeir voru flestir skólaárið 2001-2002. Það ár lærðu 1.338 nemendur þýsku sem þriðja tungumál. Skólaárið 2008-2009 lærðu 397 grunnskólabörn þýsku. Svipuð þróun hefur átt sér stað meðal frönskunema. Skólaárið 2003-2004 lærðu 354 grunnskólanemendur frönsku en á síðastliðnu skólaári lærðu 196 börn frönsku í grunnskólum landsins.

19 þúsund framhaldsskólanemendur læra erlend tungumál

Skólaárið 2008-2009 lögðu 18.699 nemendur á framhaldsskólastigi stund á nám í erlendum tungumálum eða 73,1% nemenda á þessu skólastigi. Framhaldsskólanemendur sem læra erlend tungumál eru 585 fleiri en á síðasta skólaári og hlutfall þeirra af heildarfjölda nemenda á framhaldsskólastigi hefur hækkað um tæplega eitt prósentustig.

Flestir framhaldsskólanemendur læra ensku, eða 15.607, sem eru 61% framhaldsskólanemenda. Næstflestir eru nemendur í dönsku eða 9132, 35,7% nemenda. Þessi tvö tungumál eru skyldunámsgreinar fyrir flesta nemendur í framhaldsskólum. Þýska er í þriðja sæti en skólaárið 2008-2009 voru 4519 nemendur skráðir í þýskunám og eru það 17,7% framhaldskólanemenda.

Spænska er fjórða algengasta erlenda tungumálið í framhaldsskólum með 4052 nemendur, 15,8% nemenda. Franska er í fimmta sæti með 2403 nemendur, 9,4% nemenda. Nemendum í þýsku og frönsku fækkar hlutfallslega á meðan nemendum í spænsku fjölgar á milli ára. Á undanförnum árum hefur nemendum í öllum helstu erlendu tungumálunum fækkað hlutfallslega nema í spænsku. Skólaárið 2002-2003 voru nemendur í spænsku 8,7% af heildarfjölda framhaldsskólanemenda og hefur því fjölgað um 7,1 prósentustig síðan þá. 

Fleiri stúlkur en piltar læra öll erlend mál í framhaldsskólum að þýsku undanskilinni. Hlutfall stúlkna er umtalsvert hærra en pilta meðal nemenda í þeim erlendu tungumálum sem telja má að séu valfrjáls í framhaldsskólum að þýsku undanskilinni. Þannig eru stúlkur 77,2% ítölskunema, 75,0% rússneskunema, 68,7% frönskunema og 64,8% nemenda í spænsku. Stúlkur eru 49,9% nemenda í þýsku en piltar eru 50,1% þessa hóps.

• 1 blogg um fréttina

Bloggað um fréttina

• Marta Guðjónsdóttir: Menntastefna sem býður upp á fjölbreytni og metnað