Holskefla uppboða verði frestur ekki framlengdur

Sáralítið er um að uppboðsmeðferð eigna sem hefur verið frestað sé afturkölluð. Fresturinn rennur út í lok næsta mánaðar og verði hann ekki framlengdur er von á holskeflu uppboða. Aðstoðarmaður dómsmálaráðherra segir málið í skoðun.

Samkvæmt bráðabirgðaákvæði sem bætt var við lög um nauðungarsölu í mars sl. ber sýslumanni að fresta töku ákvörðunar um byrjun uppboðs eða ráðstöfun eignar á almennum markaði fram yfir 31. október nk. óski skuldari þess. Þetta nýttu margir sér og hjá sýslumanninum í Reykjavík hefur uppboðsmeðferð verið frestað á 328 eignum og 146 hjá sýslumanninum í Keflavík. Að lögum óbreyttum hefst uppboð á eignunum því í nóvember.

Samkvæmt upplýsingum frá sýslumanninum í Reykjavík hefur málum sem hefur verið frestað ekki fækkað svo neinu nemi. Viðkomandi einstaklingum hafi því ekki tekist að vinna í sínum málum og að óbreyttu verði selt ofan af þeim.

Ása Ólafsdóttir, aðstoðarmaður dómsmálaráðherra, segir ekki hafa verið gert ráð fyrir því að fresturinn yrði framlengdur þegar frumvarp þessa efnis var samþykkt. Hins vegar sé það í skoðun sem hluti af heildarpakka ríkisstjórnarinnar og ráðist á næstu vikum. Málið muni koma til kasta Alþingis sem kemur saman að nýju nk. fimmtudag. Þó svo að heimildin liggi fyrir hafa fleiri eignir verið seldar hjá sýslumanninum í Reykjavík á árinu en á sama tíma í fyrra.

128 fasteignir höfðu í lok ágúst farið á nauðungarsölu hjá sýslumanninum í Reykjavík 76 eignir höfðu verið seldar hjá sýslumanninum í Keflavík en þær voru 27 allt árið 2007