Innlent | mbl | 25.9.2009 | 10:04

Jarðboranir segja 30 starfsmönnum upp

Bor Jarðborana að störfum

Jarðboranir hafa sagt upp þrjátíu starfsmönnum vegna fækkunar verkefna við borun jarðhita í þeim efnahagserfiðleikum sem nú ríkja á Íslandi. Segir í tilkynningu frá félagin að þetta sé í fyrsta skipti í sögu félagsins sem gripið er til hópuppsagna. Eftir uppsagnirnar munu um 150 manns starfa hjá Jarðborunum en þegar mest var sumarið 2008, störfuðu um 210 manns hjá félaginu.

Stöðugleikasáttmálinn getur breytt miklu

„Samhliða efnahagserfiðleikum á Íslandi hefur verkefnum Jarðborana hf. við borun eftir jarðhita fækkað verulega, auk þess sem tafir á framgangi stórframkvæmda hafa haft neikvæð áhrif. Er nú svo komið að draga þarf úr starfsemi félagsins hér á landi, og eru uppsagnir starfsfólks hluti þeirra aðgerða. Þetta er nauðsynlegt þrátt fyrir verksamninga sem gerðu ráð fyrir fullri nýtingu borflotans allt fram til ársins 2012.

Vegna framangreindra aðstæðna og óvissu um verkefni í vetur, er ljóst að mannaflaþörf félagsins minnkar til muna og uppsagnir um 30 starfsmanna eru því miður óhjákvæmilegar. Þetta er í fyrsta sinn í sögu félagsins sem gripið er til hópuppsagna.

Stöðugleikasáttmálinn getur breytt miklu Reynt hefur verið í lengstu lög að komast hjá uppsögnum en þar sem ekki er útlit fyrir að ástandið batni á næstu mánuðum er félaginu nauðugur einn kostur að grípa til þessara aðgerða nú," að því er segir í tilkynningu frá Jarðborunum.

Erfið ákvörðun

Bent Einarsson, forstjóri Jarðborana, segir í fréttatilkynningu að þetta sé mjög erfið ákvörðun. „Við erum að segja upp mjög hæfu starfsfólki með sérhæfða reynslu. Þetta er gott fólk sem við viljum ekki missa og það vissulega sárt ef við missum það varanlega frá okkur. Ef svo fer tapast hluti þeirrar þekkingar og forskots sem við höfum í dag í jarðvarmanýtingu og aðrar þjóðir hafa svo mikinn áhuga á.“

Jarðboranir eru með verkefni erlendis fyrir einn bor á Azoreyjum, en þar munu starfa á vegum félagsins um 40 manns fram eftir næsta ári. Vegna óvissuástandsins hér á landi er unnið að því að markaðssetja bora félagsins í verkefni erlendis, og þá m.a. í gegnum dótturfélag Jarðborana í Þýskalandi, en erfitt er að segja til um hvort eða hvenær það tekst, að því er fram kemur í tilkynningu.