Óskiljanlegar hraðahindranir
Setja bókamerki
Lögreglubíll og fólksbíll eru óökufærir eftir árekstur sem varð á Skagaströnd í morgun. Bílarnir mættust við tvískipta hraðahindrun, ökumaður fólksbílsins ætlaði að komast hjá því að aka yfir hindranirnar og beygði yfir á vinstri vegarhelming, á milli þeirra, en ók beint framan á lögreglubílinn sem var því sem næst kyrrstæður.
Frá þessu er greint á vefnum skagastrond.is og haft eftir Vilhjálmi Stefánssyni, lögreglumanni á Blönduósi, sem ók lögreglubílnum: „Það er alveg óskiljanlegt að búa til hraðahindrun sem gefur kost á því að ökumenn geti komist hjá þeim með því að aka yfir á rangan vegarhelming.“
Lögreglumaðurinn spyr: „Hvers vegna að hafa hraðahindrun ef ekki þarf að aka á hana? Meira að segja bílar sem komu þarna að eftir áreksturinn sveigðu á milli hraðahindrananna fyrir framan augun á okkur,“ segir Vilhjálmur og bætir því við að lögreglan ætli að spyrjast fyrir um tilganginn með þessu hjá sveitarstjóra Skagastrandar.
Skemmdir á lögreglubílnum voru ekki miklar en nægar til að hann var óökufær, líklega er vatnskassinn ónýtur, skv. frétt vefjarins.
Spara stórfé með olíukaupum ytra
„Má segja að þetta gos hafi þjófstartað“
„Erum í miðri hrinu“: Styttist í Eldvörp
Mæðgur dæmdar til að greiða 64 milljónir
Myndir: Grindavíkurvegur aftur undir hraun
Mjög alvarlegt ef Njarðvíkuræð gefur sig