Útlit fyrir minni halla hjá Akureyrarbæ

Útlit er fyrir að rekstrarhalli bæjarsjóðs Akureyrar nemi 985 milljónir króna í ár en fyrri áætlun hljóðaði upp á 1.100 milljón króna halla. Munar mestu um auknar útsvarstekjur bæjarfélagsins, samkvæmt endurskoðaðri fjárhagsáætlun Akureyrarbæjar sem lögð er fram á fundi bæjarstjórnar í dag.

Skatttekjur hækka um 426 milljónir króna

Forsendur upphaflegrar áætlunar hafa að mestu haldið, að því er segir í tilkynningu frá Akureyrarbæ. Reiknað var með 7% verðlagsbreytingu á milli ára en endurskoðuð áætlun gerir ráð fyrir 7,9% hækkun verðlags. Þessar forsendur hafa mikil áhrif á fjármagnsgjöld eins og kom fram í upphaflegri áætlun en reiknað var með halla upp á tæpar 1.100 milljónir króna.

Í endurskoðaðri fjárhagsáætlun kemur fram að skatttekjur bæjarins hækka um 426 m.kr. og verða 7.443 m.kr. Munar þar mestu um auknar útsvarstekjur upp á 318 m.kr. Þetta skýrist fyrst og fremst að því að efnahagsþrengingar þjóðarinnar hafa ekki komið jafn þungt niður á rekstri Akureyrarbæjar og útlit var fyrir í upphafi ársins.

Útgjöld hækka um 366 milljónir

Útgjöld bæjarsjóðs hafa á móti hækkað um 366 m.kr. og vega þar þyngst kjarasamningsbundnar launahækkanir og hækkun tryggingargjalds sem rennur í atvinnuleysistryggingasjóð. Innri húsaleiga bæjarins hækkar einnig um rúmar 94 m.kr. og annar kostnaður um 164 m.kr. Framlag til reksturs Öldrunarheimila Akureyrarbæjar hækkar um tæpar 50 m.kr. og verður samtals 183 m.kr.

240 milljónir í auknar framkvæmdir

Í vor var samþykkt sameining sveitarfélaganna Grímseyjarhrepps og Akureyrarkaupstaðar og hafa áhrif sameiningarinnar nú verið tekin inn í fjárhagsáætlun Akureyrarbæjar. Tekjur og útgjöld vegna hennar eru nánast jafn háir liðir, tekjurnar þó aðeins hærri en gjöldin.

Endurskoðað framkvæmdayfirlit gerir ráð fyrir auknum framkvæmdum upp á um 240 m.kr. og er stærsti einstaki liðurinn þar framkvæmdir við íþróttasvæði við Hamar vegna Landsmóts UMFÍ sl. sumar.

Lántaka Akureyrarbæjar á þessu ári lækkar um 1.100 m.kr. sem stafar að stærstum hluta af því að lokið var að mestu við fjármögnun ársins 2009 í árslok 2008.

• 1 blogg um fréttina

Bloggað um fréttina

• Haraldur Bjarnason: Skattarnir skila sér