Mótmæla ákvörðun umhverfisráðherra

Bæjarstjórn Sandgerðisbæjar mótmælir ákvörðun umhverfisráðherra að fella úr gildi úrskurð Skipulagsstofnunar um suðvesturlínu sem hún segir tefja mikilvæga atvinnuuppbyggingu á svæðinu og jafnvel tefla henni í tvísýnu.

Bæjarstjórnin fundaði í gær og samþykkti samhljóða eftirfarandi ályktun:

„Bæjarstjórn Sandgerðisbæjar mótmælir harðlega ákvörðun umhverfisráðherra um að fella úr gildi úrskurð Skipulagsstofnunar um suðvesturlínu og með því tefja mikilvæga atvinnuuppbyggingu á svæðinu og jafnvel tefla henni í tvísýnu.

Bæjarstjórn bendir í þessu sambandi á að atvinnuástand á Suðurnesjum er hvað verst á öllu landinu og skatttekjur sveitarfélaganna í samræmi við það. Ákvörðun ráðherrans skemmir fyrir áralöngum undirbúningi og mikilli vinnu sveitarfélaganna í atvinnuuppbyggingu á svæðinu. Bæjarstjórn bendir einnig á óöryggi á flutningi rafmagns inn á svæðið við núverandi aðstæður.

Bæjarstjórn krefst þess að ákvörðun ráðherra verði endurskoðuð tafarlaust og hún dragi ákvörðun sína til baka.“

• 3 blogg um fréttina

Bloggað um fréttina

• Ingólfur Ásgeir Jóhannesson: Náttúruvernd og atvinnuástand
• Sigríður Marteinsdóttir: Umhverfisráðherra ákvörðun.
• Haraldur Haraldsson: Mótmæla ákvörðun umhverfisráðherra/það gerum við flest!!!!!!