Innlent | mbl | 12.10.2009 | 8:20

Ekki þörf á norsku láni

Norskar krónur.

Jóhanna Sigurðardóttir, forsætisráðherra, segir í tölvupósti til norska netmiðilsins ABC Nyheter, að ekkert bendi til þess að Íslendingar þurfi frekari lánafyrirgreiðslu, en þegar hefur verið samið um.

„Vissulega hefði verið þýðingarmikið að hafa aðgang að láni af stærðargráðunni 100 milljarðar norskra króna, einkum ef það væri ekki tengt Icesave og Alþjóðagjaldeyrissjóðnum. En ekkert bendir til þess, að við þurfum stærri lánapakka en þann sem þegar hefur verið samið um," segir í tölvupóstinum, að sögn ABC.

Fréttavefurinn bar tölvupóstinn, sem Jóhanna sendi Jens Stoltenberg í síðustu viku og birtur var í gær, undir Per Olaf Lundteigen, þingmann norska Miðflokksins, sem hefur beitt sér fyrir því að Norðmenn veiti Íslendingum loforð fyrir lánalínu, allt að 100 milljörðum norskra króna. Hann segir að bréf Jóhönnu sé afar sérstætt vegna þess að Ísland sé í afar erfiðri pólitískri og efnahagslegri stöðu.

Lundteigen segir, að margir Íslendingar vilji að ríkisstjórnin snúi sér til Noregs en ekki aðeins til Alþjóðagjaldeyrissjóðsins. Segir hann að það sé afar einkennilegt að Jóhanna biðji beinlínis um að fá neikvætt svar frá norska forsætisráðherranum við spurningu um hugsanlegt samkomulag við Noreg um lán sem ekki er háð skilyrðum Alþjóðagjaldeyrissjóðsins. Skýringin gæti verið, að íslenska ríkisstjórnin hafi sagt Íslendingum, að lánið frá Alþjóðagjaldeyrissjóðnum sé eina úrræðið.