Innlent | mbl | 17.10.2009 | 8:01

Meirihluti vill segja upp samningi við AGS

Meirihluti þeirra sem tóku þátt skoðanakönnun Fréttablaðsins vill að ríkisstjórnin segi upp samningnum við Alþjóðagjaldeyrissjóðinn. Af þeim sem tóku afstöðu vildu 58% segja upp samningnum en 42% sögðust andvíg uppsögn hans.

Að sögn blaðsins vill meirihluti stuðningsmanna allra flokka utan Samfylkingarinnar segja upp samningnum. Rúmlega 65% sjálfstæðismanna vildu uppsögn, tæp 69% framsóknarmanna og 59% stuðningsmanna Vinstri grænna. Um 35% samfylkingarfólks vill segja samningnum upp.

Hringt var í 800 manns fimmtudaginn 15. október. Svarendur skiptust jafnt eftir kyni og hlutfallslega eftir búsetu. Spurt var: Á ríkisstjórnin að segja upp samningnum við Alþjóðagjaldeyrissjóðinn? Alls tóku 78% afstöðu til spurningarinnar.