Mikil aukning á fíkniefnum

Alger sprenging varð í haldlagningu ólöglegra fíkniefna í fyrra og hefur það haldið áfram á þessu ári, að sögn Karls Steinars Valssonar, aðstoðaryfirlögregluþjóns hjá Lögreglu höfuðborgarsvæðisins. Hann flutti erindi á morgunverðarfundi VIKU 43 í morgun.

Karl Steinar sagði að á skrá hjá lögreglunni sé um 100 manns sem talið er að séu mikið í sölu og dreifingu fíkniefna. Í ár hafa verið rannsökuð 48 mál sem tengjast framleiðslu á kannabisefnum. Búið er að gefa út ákærur í þeim flestum, en um tíu mál eru á lokastigum rannsóknar. Í heild er búið að leggja hald á 600-700 kg af kannabisplöntum til viðbótar við tugi kílóa af tilbúnu marijúana, kannabislaufum og hassi.

Karl Steinar sagði að ábendingum frá borgurunum um grunsemdir um kannabisræktun á ýmsum stöðum hafi beinlínis rignt inn til lögreglu. Góður árangur fíkniefnadeildar lögreglu höfuðborgarsvæðisins við að uppræta slíka starfsemi hefur orðið til þess að fíkniefnaframleiðsla hefur í auknum mæli færst út á land og þar eru nú margar kannabisræktanir, að sögn Karls Steinars. 

Morgunverðarfundurinn var haldinn í tilefni vímuvarnarviku. Að honum stóð Samstarfsráð um forvarnir, SAMFO. Það er vettvangur félagasamtaka sem vilja leggja forvörnum lið og/eða hafa forvarnir að markmiði starfs síns. Í því skyni er árlega efnt til vímuvarnaviku meðal annars með það að markmiði að vekja athygli landsmanna á mikilvægi forvarna, einkum forvörnum sem beinast að börnum og unglingum.

Verkefnið ber nú yfirskriftina Vika 43 og stendur
að þessu sinni yfir dagana frá 18. október til 24. október.

Karl Steinar Valsson