Vara við breytingum á sýslumannsembætti

Framsýn - stéttarfélag varar við boðuðum breytingum á sýslumannsembættinu á Húsavík, en tillögur miða að því að sameina sýslumannsembættin á Norðurlandi. Framsýn óttast að stöðugildum verði fækkað og þjónusta við íbúa muni skerðast. Að auki varar félagið við niðurskurði í löggæslu í Þingeyjarsýslum.

„Niðurskurðurinn er þegar farinn að koma niður á öryggi íbúanna á svæðinu sem er grafalvarlegt mál. Framsýn hvetur dómsmálaráðherra til að tryggja nægjanlegt fjármagn til löggæslu á svæðinu. Jafnframt að stöðugildi lögregluþjóna verði með ásættanlegum hætti fyrir íbúana og allan þann fjölda ferðamanna sem heimsækja Þingeyjarsýslurnar á hverju ári. Við annað verður ekki unað,“ segir í ályktun stéttarfélagsins.

Stéttarfélagið telur mikilvægt að horft verði til þess við endurskipulagningu á nýju sýslumannsembættunum að störfum verði fjölgað á Húsavík. „Mikill mannauður er til staðar hjá sýslumannsembættinu á Húsavík sem mikilvægt er að nýta til góðra verka hjá nýjum embættum. Auk þess sem um er að ræða mjög verðmæt störf fyrir svæðið.“

• 2 blogg um fréttina

Bloggað um fréttina

• Jón Snæbjörnsson: Sníða sér stakk eftir vexti
• Hulda Elma Guðmundsdóttir: Einn sýslumaður í NA-kjördæmi