Gagnrýna félagsmálaráðherra

Samtök iðnaðarins gagnrýna Árna Pál Árnason félagsmálaráðherra fyrir orð sem hann lét falla í ræðu á ársfundi ASÍ í gær. „Ekki er gott að átta sig á tilgangi félagsmálaráðherra með ræðu sinni. Erfitt er að minnsta kosti að sjá að henni hafi verið ætlað að vera lóð vogarskálar þess að halda lífi í stöðugleikasáttmálanum,“ segja samtökin.

Fram kemur í tilkynningu frá SI að félagsmálaráðherra hafi væntanlega ætlað að gefa tóninn fyrir lokasprettinn til að halda lífinu í stöðugleikasáttmálanum, með ræðu sinni í gær. Samtökin segja að vonandi sé ræða hans ekki til marks um viðhorf ríkisstjórnarinnar í þeim efnum.
 
„Það er langt síðan orðræða af því tagi sem félagsmálaráðherra hafði uppi hefur heyrst. Óforskammaðir kapítalistar, útgerðarauðvald, erlendir auðhringar, ginningarfífl stóriðju, grátkór og kveinstafir útgerðar og álfyrirtækja skal það nú heita,“ segja samtökin.
 
„Staðreyndin er sú að atvinnurekendur og verkalýðshreyfingin hafa staðið við sitt við í tengslum við gerð stöðugleikasáttmálans en ríkisstjórnin ekki. Það er bláköld staðreynd. Skeytasendingar félagsmálsmálaráðherra breyta því ekki. Ekki heldur því að atvinnurekendur og verkalýðshreyfingin eru samstiga í gagnrýni sinni á ríkisstjórnina fyrir að hafa ekki staðið við sitt, ekki síst á sviði uppbyggingar í tengslum við framkvæmdir tengdar stóriðju. Sama gildir um afstöðuna til hugmyndanna um orku- umhverfis- og auðlindaskatta sem skellt er fram í fjárlagafrumvarpinu. Þá hafa báðir aðilar gagnrýnt framgöngu umhverfisráðherra varðandi mat á umhverfisáhrifum vegna Suðvesturlínu,“ segja samtökin ennfremur.

• 2 blogg um fréttina

Bloggað um fréttina

• Páll Vilhjálmsson: Ráðherrar skapa sér stöðu fyrir fallið
• Andri Geir Arinbjarnarson: Pólitísk atvinnustefna