Brýrnar yfir Hringbraut og Njarðargötu fá viðurkenningu

Göngubrýr yfir Njarðargötu og Hringbraut hafa hlotið viðurkenningu fyrir gerð þeirra og frágang. Það er Vegagerðin sem stóð fyrir viðurkenningunni.

Vegagerðin hefur um nokkurt skeið veitt viðurkenningu fyrir gerð og frágang mannvirkja. Í gær var þessi viðurkenning veitt í þriðja sinn, fyrir verk sem lokið var við á árunum 2005-2007.

Í umsögn dómnefndar um brýrnar yfir Hringbraut og Njarðargötu segir, að þar fari saman falleg mannvirki og góður frágangur. Hönnun sé vönduð og mikið lagt upp úr mjúkum línum. Frágangur er allur hinn vandaðasti, falleg og vel unnin hellulögn og slétt brúaargólf. Brýrnar séu í senn svipmikil mannvirki og sérstök, en falli um leið vel að umhverfi sínu og þjóni vel tilgangi sínum sem tenging Vatnsmýrar og Háskólaumhverfis við Tjörnina og miðbæ Reykjavíkur.

Verkið var samstarfsverkefni Vegagerðarinnar og Reykjavíkurborgar. Verktaki voru Háfell og Eykt. Um hönnun sáu Línuhönnun (nú Efla) og Stúdíó Granda. Um eftirlit sá Almenna Verkfræðistofan.