Innlent | mbl | 29.10.2009 | 12:50 | Uppfært 14:07

Skuldirnar ekki óviðráðanlegar

Mark Flanagan, yfirmaður Íslandsmála hjá Alþjóðagjaldeyrissjóðnum.

Nú rétt í þessu lauk símafundi fjölmiðla með fulltrúum Alþjóðagjaldeyrissjóðsins í málefnum Íslands, þeim Mark Flanagan og Franek Rozwadowski. Þar fóru þeir yfir stöðuna í áætlun Íslands með AGS og svöruðu spurningum um nýafstaðna endurskoðun og fleiri atriði.

Á meðal þess sem fram kom á fundinum var að erlendar skuldir íslenska þjóðarbúsins eru mun hærri en starfsmenn Alþjóðagjaldeyrissjóðsins áttuðu sig á við upphaf áætlunar sjóðsins með Íslandi. Engu að síður telur Mark Flanagan, yfirmaður Íslandsmála hjá sjóðnum, að þær séu vel viðráðanlegar. Þær eru nú 310% af landsframleiðslu, en áður hafði hann sagt að 240% af landsframleiðslu væru óviðráðanlegar erlendar skuldir.

Ástæða þess að hann telur skuldirnar viðráðanlegar nú eru margþættar, en á símafundinum nú eftir hádegið gaf hann svipuð svör og Gylfi Magnússon, efnahags- og viðskiptaráðherra, hefur áður gefið. Það er að eðlilegt sé að erlendar skuldir séu miklar í alþjóðavæddu hagkerfi og mörg lönd sem ekki séu í teljandi vandræðum hafi háar erlendar skuldir, mörg löndu skuldi yfir 200% af landsframleiðslu sinni.

Því til viðbótar sagði hann að fyrri yfirlýsingar hafi byggst á umhverfi og stefnu þess tíma í ríkisfjármálum. Síðan þá hafi verið varið í umtalsverðar endurbætur á stefnunni, og skapaður betri grundvöllur fyrir jákvæðan viðskiptaafgang við útlönd. Skuldirnar hafi því verið óviðráðanlegar að óbreyttu á sínum tíma, en nú horfi öðruvísi við.

Þá sagði Flanagan að eftir því sem endurheimt erlendra eigna bankanna og verðhækkun þeirra hafi miðað áfram hafi staðan batnað.