Innlent | mbl | 9.11.2009 | 11:26

Settu sand í olíutank valtara - eldur kviknaði

Skemmdarverk var unnið á valtara sem stóð við Oddgeirshólaveg í síðustu viku. Að sögn lögreglunnar á Selfossi var sandur settur í olíutankinn auk þess kviknaði eldur í valtaranum rétt eftir að stjórnandi þess setti hann í gang. Stjórnandanum tókst hins vegar að kæfa eldinn með úlpunni sinni.

Fram kemur á vef lögreglunnar að ekki sé vitað hver eða hverjir hafi verið þarna að verki.

Þá bárust lögreglunni á Selfossi fjórar tilkynningar um innbrot í sumarbústaði í síðustu viku. Í einu tilviki var farið inn í orlofshús í Ölfusborgum og þaðan stolið ýmsum munum, svo sem fartölvu. Hún fannst síðar í öðru húsi á staðnum. Þá var farið inn í bústað í landi Kaldárhöfða, Lækjarbakka og Kiðjabergi. Þjófarnir höfðu á brott ýmis tæki svo sem flatskjái, hljómtæki og verkfæri.

Um síðustu mánaðamót var bátakerru stolið þar sem hún stóð fyrir utan fyrirtækið Ramma við Óseyrarbraut í Þorlákshöfn. Kerran er lág með átta tommu dekkjum, sex metra löng og hálfur annar metri á breidd.

Þeir sem geta veitt upplýsingar um kerruna eru beðnir að hafa samband við lögreglu í síma 480 1010.