Spyr um áhrif tekjuskattshækkana á greiðslugetu heimila

Tryggvi Þór Herbertsson, fulltrúi Sjálfstæðisflokksins í efnahags- og skattanefnd, hefur óskað eftir því við Helga Hjörvar, formann nefndarinnar, að Seðlabanka Íslands verði farlið að skoða hvaða áhrif fyrirhugaðar tekjuskattshækkanir muni hafa á greiðslugetu heimilanna.

Í fyrirspurn sinni til formanns efnahags- og skattanefndar spyr Tryggvi hversu mörg heimili færist yfir í þann flokk sem ekki ræður við skuldir sínar við fyrirhugaða lækkun ráðstöfunartekna vegna fyrirhugaðra tekjuskattshækkana. Einnig spyr hann hvaða áhrif virðisaukaskattshækkun hafi á annars vegar greiðslugetu heimilanna og  hins vegar hækkun verðtryggðra lána?

Auk þess vill Tryggvi fá upplýsingar um almenn áhrif skattahækkana á ráðstöfunartekjur og greiðslugetu heimilanna og hvaða áhrif frysting persónuafsláttar hafi á greiðslugetu heimilanna?

„Tekjur heimilanna hafa lækkað svo mikið í kjölfar hrunsins og greiðslugeta heimilanna versnað. Það að taka af heimilunum viðbótar tekjur mun leiða til þess að enn fleiri heimili lendi í vandræðum og vandamálin koma þá fram annars staðar í kerfinu,“  segir Tryggvi og tekur fram að jafnframt megi búast við því að fyrirhugaðar tekjuskattshækkanir muni draga úr umsvifum í þjóðfélaginu.  

Aðspurður segist hann telja að Seðlabankinn eigi að geta svarað fyrirspurn hans á aðeins nokkrum dögum. „Svona úttekt sem ég er að kalla eftir á ekki að þurfa að taka langan tíma að gera, því Seðlabankinn er kominn með gríðarlega góða gagnagrunna um greiðslugetu og skuldabyrði heimilanna.“

• 4 blogg um fréttina

Bloggað um fréttina

• Ómar Geirsson: Fyndinn Tryggvi.
• Marinó G. Njálsson: Þörf á hagspá fyrir heimilin
• Jóna Kolbrún Garðarsdóttir: Hvað kostaði afskrift kúluláns Tryggva þjóðina?
• Einhver Ágúst: Vondi ráðgjafinn með kúlulánið...