Innlent | mbl | 13.11.2009 | 18:27 | Uppfært 18:46

Lausn Icesave-deilunnar ekki skilyrði AGS

Dominique Strauss-Kahn, framkvæmdastjóri AGS. Reuters

Dominique Strauss-Kahn, framkvæmdastjóri Alþjóðagjaldeyrissjóðsins, segir að allir, þar á meðal AGS, verði að gera betur í því að útskýra fyrir Íslendingum hvað sé verið að gera til að taka á efnahagskreppunni. Hann segir jafnframt að AGS hafi aldrei sett það sem skilyrði að íslensk stjórnvöld yrðu að leysa Icesave-deiluna, áður en AGS tæki málefni Íslendinga til skoðunar.

Þetta kemur fram í svarbréfi Strauss-Kahn til Gunnars Sigurðssonar leikstjóra, sem bauð framkvæmdastjóranum til landsins fyrir hönd þeirra sem hafa staðið að opnum borgarafundum. Strauss-Kahn segist því miður ekki geta komist til landsins. Bréfið er birt á vef AGS.

Strauss-Kahn segist vera sammála því að efnahagskreppan á Íslandi sé mjög alvarleg, og eitt það alvarlegasta sem íslenska þjóðin hafi orðið að standa frammi fyrir.

Hvað varðar Icesave, þá segir framkvæmdastjórinn að það sé ekki hlutverk AGS að skipta sér af tvíhliða deilum ríkja. Það hafi sjóðurinn ekki gert. Hann tekur það hins vegar fram að Icesave-deilan hefði hins vegar tafið endurskoðun AGS með óbeinum hætti. Tafir hafi orðið á fjármögnun lána frá Norðurlöndunum. Strauss-Kahn bendir á lausn Icesave-deilunnar hafi verið skilyrði Norðurlandanna.

Strauss-Kahn segir einnig að upphaf kreppunnar megi rekja til íslenskra fjármálastofnana. Bankarnir hefðu tekið of mikla áhættu og eftirlitsaðilar hefðu ekki staðið sig í stykkinu. Einkavæðingin hefði lagt grunninn að þróuninni.

Þá kveðst Strauss-Kahn vera þess fullviss að samvinna AGS og íslenskra stjórnvalda verði Íslandi til góðs. Sú fjárhagsaðstoð sem Íslendingar muni fá sé óvenjulega mikil miðað við stærð íslenska hagkerfisins. Aðstoðin hafi m.a. átt þátt í því að koma á gengisstöðugleika hérlendis.

Hann segir jafnframt að áhrif efnahagssamdráttarins hérlendis hafi verið mun minni hér á landi samanborið við önnur lönd sem hafi þurft að ganga í gegnum alvarlegra efnahagskreppu.