Stjórnarflokkarnir ósamstíga

Fulltrúar stjórnarflokkanna í efnahags- og skattanefnd Alþingis eru klofnir í afstöðu sinni gagnvart ríkisábyrgð á Icesave-reikningunum. Málið var afgreitt úr nefndinni í dag og Vinstri grænir og Samfylkingin munu skila sitthvoru álitinu til fjárlaganefndar þingsins, sem enn er með frumvarpið til meðferðar. Þá vinnur stjórnarandstaðan í efnahags- og skattanefnd nú að gerð sér nefndarálits.

Helgi Hjörvar, formaður nefndarinnar og þingmaður Samfylkingarinnar, segir að fjárlaganefnd muni taka málið á ný fyrir á fundi sínum í byrjun næstu viku. Helgi vildi ekki tjá sig um það í hverju munurinn felist hjá flokkunum.

Ekki náðist í Lilju Mósesdóttur, varaformann efnahags- og skattanefndar, eða Ögmund Jónasson, samflokksmanns Lilju í VG.

Sjálfstæðisflokkurinn, Framsóknarflokkurinn og Hreyfingin greiddu atkvæði gegn því að taka frumvarpið úr nefndinni. Stjórnarandstaðan telur að málið sé engan veginn fullreifað og fullrætt í nefndinni.

Stjórnarandstaðan hefur frest fram á sunnudagskvöld til að ljúka gerð sameiginlegs nefndarálits. 

• 5 blogg um fréttina

Bloggað um fréttina

• Sigurður Þórðarson: "Vilja nýta VG þar til samningar nást við ESB"
• Magnús Helgi Björgvinsson: Þetta fer nú að verða nokkuð þreytandi
• Ómar Geirsson: Auðvita er ágreiningur.
• Kristin stjórnmálasamtök: Leyndarhyggjan enn í fyrirrúmi
• Jóhann Elíasson: KEMUR EKKI Á ÓVART!!!!!