Óslóar-jólatréð fellt við hátíðlega athöfn

Óslóar-jólatréð var fellt við hátíðlega athöfn í Grefsenkollen skóginum fyrir utan Ósló í dag, en tréð er árleg gjöf til Reykjavíkurborgar. Viðstaddir voru meðal annarra borgarstjóri Óslóar, Fabian Stang, sendiherra Noregs á Íslandi, Margit Tveiten, sendiherra Íslands í Noregi, Sigríður Dúna Kristmundsdóttir og íslenski presturinn í Noregi sr. Arna Grétarsdóttir.

Þetta kemur fram á vef utanríkisráðuneytisins. 

Fram kemur að þetta sé í fyrsta sinn sem tréð sé fellt við slíka athöfn og áttu borgarstjóri Óslóar, umhverfissvið borgarinnar og sendiráð Íslands í Ósló frumkvæði að athöfninni.

Til hennar komu Íslendingar búsettir í borginni þar á meðal hópur leikskólabarna. Boðið var upp á skógarpylsur og kaffi við snarkandi varðeld, sungnir voru jólasöngvar og ræður haldnar.

Sendiherrarnir munduðu síðan sögina og fóru langleiðina með að fella tréð. Var trénu síðan beðið allra heilla á ferðalaginu til Íslands en það leggur af stað sjóleiðina til Reykjavíkur næstkomandi fimmtudag.

• 1 blogg um fréttina

Bloggað um fréttina

• Hólmdís Hjartardóttir: MIG GRUNAR AÐ ÞAÐ VERÐI FELLT AFTUR.