Innlent | mbl | 22.11.2009 | 19:14 | Uppfært 22:05

Grunuð um stórfelldan fjárdrátt hjá Kaupþingi

Kaupþing mbl.is/Ómar

Kona sem vann árum saman við eignastýringu hjá Gamla Kaupþingi var í sumar kærð til efnahagsbrotadeildar lögreglu vegna gruns um fjárdrátt. Um miklar tölur mun vera að tefla.

Þetta kom fram í fréttum Sjónvarpsins, sem sagði, að konan hefði höndlað með skuldabréf og víxla fyrir afmarkaðan hóp viðskiptavina en fyrirtæki voru ekki þar á meðal. Meintur fjárdráttur kom í ljós eftir fall Kaupþings banka fyrir ári þegar Nýja Kaupþing, sem nú heitir Arion, tók við.

Jóhannes Rúnar Jóhannesson sem situr í skilanefnd Kaupþings vildi í samtali við Morgunblaðið, ekki upplýsa hve mikla fjármuni konan er grunuð um að hafa svikið út né staðfesta að um hundruðir milljóna væri að ræða eins og Sjónvarpið hélt fram.