Innlent | Bæjarins besta | 9.12.2009 | 9:27

Aukning í bruggi

Hækkun á áfengisverði fær ýmsa til þess að snúa sér að bruggi mbl.is/Golli

Lögreglan á Ísafirði hefur ekki fengið brugg- eða smyglmál á áfengi inn á borð til sín en Önundur Jónsson, yfirlögregluþjónn á Ísafirði, segir að lögreglan hafi heyrt það að bruggun hafi aukist gríðarlega. Þetta kemur fram á vef Bæjarins besta í dag.

„Þetta hefur ekki komið inn á borð hjá okkur, en maður heyrir það útundan sér að bruggun hefur aukist gríðarlega,“ segir Önundur Jónsson, yfirlögregluþjónn lögreglunnar á Ísafirði, inntur eftir staðfestingu á þeim orðrómi að brugg í heimahúsum og smygl hafi aukist í kjölfar hækkandi áfengisverðs.

„Þetta kemur náttúrulega ekkert inn á borð hjá okkur, fyrr en við förum að leita eftir því,“ segir Önundur, „en það er bara rökrétt að fólk leitar annarra leiða til að verða sér úti um áfengi þegar verðið hækkar. Það hættir ekki að drekka. Það sem mér finnst hins vegar skuggalegast er að þetta er vatn á myllu dópsala. Þeirra söluvara verður á miklu hagstæðara verði í samanburði við áfengið og auðveldara að sannfæra unglingana um að miklu sniðugra sé að kaupa sér hass en áfengisflösku.“

„Við erum líka vakandi fyrir því að farið verði að selja brugg á götum úti eins og gert var fyrir tíu árum, en enn hefur ekki borið á því.“

Önundur segir líka óhjákvæmilegt að smygl aukist með hækkandi áfengisverði. Einnig hafi borist fregnir af því að sala á bruggvörum hafi stóraukist í þeim verslunum sem sérhæfa sig í þeim. „Það segir manni það að það er verið að brugga bæði léttvín og bjór í stórum stíl og í framhaldi af því eykst drykkjan. Ef þú ert með 20 flöskur af áfengi heima hjá þér, þá bara drekkurðu meira, það er ekkert flóknara en það. Og það er búið að lauma þeim upplýsingum að mér að alls staðar þar sem því verður við komið sé fólk byrjað að eima.“

Önundur segir Finna hafa varað Íslendinga við hækkun áfengisverðs, þeir hafi lent í miklum dóp- og bruggfaraldri eftir slíkar hækkanir hjá sér. „Hækkun á áfengisverði er ekkert annað en ávísun á meiri heimaneyslu,“ segir Önundur.