Eigum að fjárfesta í nýsköpum og sprotastarfsemi

Ari Kristinn Jónsson, sem tekur við embætti rektors Háskólans í Reykjavík 23. janúar, segir að menntun sé lykilatriði í íslensku endurreisninni. Þá eigi Íslendingar nú að fjárfesta í nýsköpun og sprotastarfsemi og slíkar fjárfestingar geti skilað miklum arði þegar fer að rofa til í atvinnulífinu.

„Það hefur sýnt sig hvarvetna, að náin tengsl eru á milli menntunar þjóðar og lífsgæða. Það er auðvelt að sjá mun á löndum þar sem menntunarstig er hátt og svo aftur lægra og hvernig samfélagið vinnur úr sínum málum - og það byggir á menntun og nýsköpun," sagði Ari Kristinn.

Hann sagði, að HR muni undir hans stjórn halda áfram á þeirri braut sem skólinn hafi markað sér um akademíska uppbyggingu og styrk og að efla rannsóknir og gæði kennslunnar.

„Nemendur þurfa menntun fyrir nútímann og í því felst meira en bóknám - líka þverfaglegt nám, verkleg kennsla og fleira. Verkefnið sem ég sé fyrir mér nú er að efla tengslin við atvinnulífið og verða enn virkari þáttakandi í starfi með fyrirtækjum að verkefnum og nýsköpun en við höfum verið. Við getum fjölgað sprotafyrirtækjum sem koma út úr slíku starfi, vöruhugmyndum, tækninýjungum og öðru sem getur nýst í atvinnulífinu og samfélaginu."