Álftanes í gjörgæslu ráðuneytis

Skuldir og skuldbindingar Álftaness nema ríflega sjö milljörðum króna og er sveitarfélagið komið í greiðsluþrot. Gert er ráð fyrir að skýrsla um fjármál Álftaness, sem eftirlitsnefnd um fjármál sveitarfélaga lét gera, verði kynnt á fundi ríkisstjórnarinnar í dag, en hún hefur verið kynnt samgönguráðherra og sveitarstjórn Álftaness.

Fyrir rúmlega mánuði tilkynnti sveitarstjórn Álftaness að fjárþröngin væri svo alvarleg að sveitarstjórnin gæti ekki staðið í skilum. Síðan hefur eftirlitsnefndin átt fundi með fulltrúum sveitarfélagsins til að leita allra mögulegra leiða út úr vandanum. Árstekjur upp á um milljarð standa ekki undir ríflega sjö milljarða skuldum og skuldbindingum og því er Álftanes í raun gjaldþrota, þó í lögum segi að sveitarfélög geti ekki orðið gjaldþrota.

Samkvæmt heimildum Morgunblaðsins hafa engar ákvarðanir verið teknar um framhaldið.