Götur borgarinnar þvegnar í nótt

Nokkrar götur í Reykjavík verða þvegnar og sópaðar í nótt  til að minnka líkur á svifryksmengun næstu daga en spáð er hægum vindi og þurrviðri í vikunni. Vatnsbíll mun úða saltpækli á götuna og götusópur fylgir í kjölfarið til að ná upp rykinu sem spænst hefur upp að undanförnu.

Samkvæmt upplýsingum frá framkvæmda- og eignasviði Reykjavíkur er þetta í fyrsta sinn sem saltpækill er notaður með þessum hætti til götuþvottar og með því móti sé ekki hætta á hálkumyndun vegna þvottarins.

Til verksins í nótt verða notaðir tveir vatnsbílar og tveir götusópar. Göturnar sem verða þvegnar og sópaðar í nótt eru Kringlumýrarbraut frá Fossvogi að Suðurlandsbraut, Miklabraut austan Kringlumýrarbrautar og Grensásvegur. Vegfarendur eru beðnir um að sýna aðgát er þeir aka framhjá vinnutækjum. 

• 2 blogg um fréttina

Bloggað um fréttina

• Þorsteinn H. Gunnarsson: Tímabært verk
• Ómar Ragnarsson: Er nú ekki nóg af saltinu ?