Óbreytt framlag Íslands í þróunarsjóð

Ísland, Noregur, Liechtenstein og Evrópusambandið árituðu í dag drög að samningi um nýjan þróunarsjóð EFTA. Samið var um að framlag til þróunarsjóðsins verði tæplega 200 milljónir evra á ári næstu fimm árin, sem er um 30% hækkun. Engin hækkun verður þó á framlagi Íslands í evrum talið og segir utanríkisráðuneytið, að Evrópusambandið hafi gefið verulega eftir frá sínum upphaflegu kröfum.

Samhliða samningaviðræðunum hafa átt sér stað viðræður um markaðsaðgang með sjávarafurðir. Var staðfest framlenging samninga um árlega tollfrjálsa viðbótarinnflutningskvóta fyrir sjávarafurðir frá Íslandi: 950 tonn af heilfrystri síld, 520 tonn af humri og 750 tonn af  karfaflökum.

Samkvæmt samningnum verður framlag Íslands í þróunarsjóð EFTA næstu fimm árin óbreytt í evrum talið frá því sem verið hefur undanfarin fimm ár, eða ríflega 7 milljónir evra árlega, jafnvirði 1,3 milljarða króna. Á sama tíma hækka heildarframlög Noregs um alls 22% og framlög Liechtenstein um 33%.

Þróunarsjóður EFTA var stofnaður í þeim tilgangi að jafna efnahagslegan og félagslegan mismun á EES-svæðinu. Með samningnum um stækkun EES-svæðisins var samið um aukin framlög EFTA-ríkjanna þriggja til fjármögnunar á umbótum og uppbyggingu í þeim aðildarríkjum ESB sem standa illa í efnahagslegu tilliti. Markmiðið er að jafna samkeppnisstöðu þeirra aðildarríkja sem standa að innri markaði Evrópska efnahagssvæðisins með því að draga úr efnahagslegri og félagslegri misskiptingu innan svæðisins.

• 1 blogg um fréttina

Bloggað um fréttina

• Sigurður Þórðarson: Evrópusambandið kúgar fé út úr EFTA fyrir markaðsaðgang