Innlent | mbl | 23.12.2009 | 14:31

Spá óveðri um landið norðvestanvert

Mjög hvasst verður um landið norðvestanvert. Myndin er úr safni. mbl.is/RAX

Búast má við mjög slæmu ferðaveðri um norðvestanvert landið á morgun, að því er fram kemur á vef Veðurstofu Íslands. Þá er búið að gefa út viðvörun en búist er við stormi á Vestfjörðum á morgun.

Veðurstofan spáir norðan 8-15 metrum á sekúndu og éljum á landinu norðanverðu. Skýjað verður með köflum syðra og dálítil él sums staðar sunnan- og suðvestanlands fram undir kvöld. Gengur í norðaustan 18-23 metra á sekúndu á Vestfjörðum á morgun, en hægari annars staðar, einkum austantil. Snjókoma eða él fyrir norðan, en bjart syðra.

Frost víða 4 til 14 stig, kaldast til landsins, en dregur úr frosti á morgun.

Samkvæmt upplýsingum frá Vegagerðinni eru vegir auðir á Suður- og Suðausturlandi.

Á Vesturlandi eru hálkublettir á Holtavörðuheiði, Gilsfirði og í Svínadal.

Á Vestfjörðum er snjóþekja í Ísafjarðardjúpi, hálkublettir og éljagangur er á Þröskuldum og Steingrímsfjarðarheiði. Hálkublettir eru á Klettshálsi, Kleifaheiði, Mikladal og á Hálfdán. Einnig eru hálkublettir á Gemlufallsheiði og í Önundarfirði, snjóþekja og skafrenningur er í Súgandafirði. Þæfingsfærð og skafrenningur er á Hrafnseyrarheiði og stendur mokstur þar yfir og verður það síðasta mokstursferð fyrir jól. Ófært er í Árneshrepp.

Á Norðurlandi er hálka í Vatnsskarði, Víkurskarð og á Mývatnsheiði. Hálkublettir á Þverárfjalli og á Öxnadalsheiði en snjóþekja á Siglufjarðarvegi, á milli Akureyrar og Ólafsfjarðar og frá Húsavík að Laugum. Einhver éljagangur eða snjókoma er á þessu svæði.

Á Norðausturlandi er snjóþekja, hálkublettir og éljagangur.

Á Austurlandi eru víða hálkublettir og snjóþekja. Snjóþekja og éljagangur er á Fjarðarheiði. Hálkublettir eru í Oddskarði og Fagradal en þar er einnig snjókoma. Einhver hálka er með ströndinni.