Innlent | mbl | 12.1.2010 | 13:29

Minna keypt af áfengi

ásdís

Sala áfengis minnkaði um 2,3% í desember miðað við sama mánuð árið áður á föstu verðlagi, en þá er miðað við þá krónutölu sem er í gangi hvert sinn sem mælt er óháð öllum öðrum áhrifum og jókst um 13,8% á breytilegu verðlagi, en þá á sér stað leiðrétting á verðlaginu með því að taka tillit til verðbreytinga sem hafa orðið á tímabilinu. Leiðrétt fyrir árstíðabundnum þáttum nam samdráttur í veltu áfengis í desember 6,3% frá sama mánuði í fyrra. Verð á áfengi var 16,5% hærra í desember síðastliðnum en í sama mánuð í fyrra, samkvæmt smásöluvísitölu Rannsóknaseturs verslunarinnar.

Aukin velta í dagvöruverslunum

Velta í dagvöruverslun jókst um 1,7% á föstu verðlagi í desember miðað við sama mánuð árið áður og jókst um 9,6% á breytilegu verðlagi. Leiðrétt fyrir árstíðabundnum þáttum nam aukning í veltu dagvöruverslana í desember 3,1% frá sama mánuði árið áður. Verð á dagvöru hækkaði um 7,8% á síðastliðnum 12 mánuðum.

Fataverslun var 2,3% minni í desember miðað við sama mánuð árið áður á föstu verðlagi en jókst um 13,1% á breytilegu verðlagi á sama tímabili. Verð á fötum var 18,5% hærra í desember síðastliðnum en í sama mánuði ári fyrr. Velta skóverslunar jókst um 2,0% í desember á föstu verðlagi og um 22,7% á breytilegu verðlagi miðað við sama mánuð í fyrra. Verð á skóm hækkaði í desember um 20,3% frá desember í fyrra.

Mikil aukning í raftækjasölu

Velta húsgagnaverslana var 1,1% minni í desember en í sama mánuði í fyrra á föstu verðlagi og 23,5% minni á breytilegu verðlagi. Verð á húsgögnum var 11,9% hærra í desember síðastliðnum miðaða við sama mánuð í fyrra.

Sala á raftækjum í desember jókst um 15,3% á föstu verðlagi frá sama mánuði í fyrra og um 34% á breytilegu verðlagi á sama tímabili. Verð á raftækjum hækkaði um 16,2% frá desember 2008.

Leita þarf aftur til mars 2008 til að finna jafn mikla veltu að raunvirði í raftækjaverslun, að því er segir í tilkynningu.

„Þá er athyglisvert að aukning varð í veltu dagvöruverslunar í desember síðastliðnum frá sama mánuði ári áður. Hér er um raunaukningu að ræða á milli ára því þegar bæði hefur verið tekið tillit til verðlagsbreytinga á tímabilinu og leiðrétt fyrir daga- og árstíðabundnum þáttum nam veltuaukningin 3,1% en slík aukning á milli ára hefur ekki orðið síðan um mitt ár 2008. Þó ber að hafa í huga í þessum samanburði að jólaverslun í fyrra dróst mikið saman frá fyrri árum.

Jólaverslun með föt dróst hins vegar saman bæði í nóvember og desember frá sama tímabili í fyrra á föstu verðlagi en skóverslun jókst báða þessa mánuði. Greinilegt er að landsmenn hafa dregið úr fatakaupum á síðustu tveimur árum því velta faraverslunar var 26,3% meiri í desember 2007 en í desember síðastliðnum. Skóverslun í desember 2007 var 21,1% meiri en í desember síðastliðnum, mælt á föstu verðlagi.

Mikill samdráttur hefur verið í sölu húsgagna allt frá ágúst 2008. Enn hefur húsgagnaverslun ekki náð sér á strik þó hún hafi aukist nokkuð í desember síðastliðnum frá mánuðinum á undan.

Svo virðist sem jólaverslun hafi verið heldur meiri en spár Rannsóknaseturs verslunarinnar gerðu ráð fyrir, en þar var gert ráð fyrir því að jólaverslun yrði óbreytt á föstu verðlagi frá árinu áður. Of fljótt er þó um það að segja því mælingar Rannsóknasetursins ná ekki til allrar verslunar í landinu.

Vísbendingar eru um að meira jafnvægi sé að komast á einkaneyslu eftir samdráttarskeið sem hefur staðið í meira en ár. Kaupmáttur mældist samt 7,6% minni fyrstu ellefu mánuði síðasta árs en á sama tímabili árið áður og raunlækkun varð á greiðslukortanotkun innanlands um16%," að því er segir í tilkynningu frá Rannsóknarsetri verslunarinnar.