Sáu mikla eyðileggingu

Rústabjörgunarsveitin lenti rétt í þessu á Port-au-Prince flugvellinum í Haítí og gengur allt eftir áætlun samkvæmt upplýsingum frá Utanríkisráðuneytinu. Þegar flogið var yfir borgina sáu björgunarsveitarmenn mikla eyðileggingu og fólk sem safnast hafði saman á opnum svæðum. 

Innlendir vallarstarfsmenn fögnuðu komu sveitarinnar og þökkuðu henni vel fyrir.

Sveitin vinnur að því að afferma vélina. Það er gert með höndunum því enginn búnaður er tiltækur á flugvellinum, samkvæmt upplýsingum Slysavarnafélagsins Landsbjargar. 

Stjórnendur íslensku björgunarsveitarinnar munu síðan hitta fulltrúa Sameinuðu þjóðanna á svæðinu en sveitin mun vinna í samstarfi við þá.

Ganga þarf rösklega til verks og finna öruggan stað fyrir búðirnar því eftir tvö til þrjá tíma skellur á myrkur á Haítí. Þá þarf að gæta fyllsta öryggis félaga í björgunarsveitinni, segir Slysavarnafélagið Landsbjörg.

Flugvélin sem sveitin kom með átti að fara aftur á miðnætti með erlenda ríkisborgara frá Haítí.

Hvorki er komið á hreint hve margir fara til baka með vélinni né frá hvaða löndum, samkvæmt upplýsingum utanríkisráðuneytisins. Gengið hefur illa að fá upplýsingar um slíkt vegna ástandsins.