Innlent | mbl | 14.1.2010 | 19:27

Segja um góðan fund að ræða

Fulltrúar flokkanna á þingi á fundi í Stjórnarráðinu í kvöld. mbl.is/Árni Sæberg

„Þetta var ágætur fundur. Það voru stigin skref á þessum fundi,“ segir Bjarni Benediktsson, formaður Sjálfstæðisflokksins, en fundi fulltrúa allra þingflokka, sem hófst í Stjórnarráðinu um kvöldmatarleytið, lauk fyrir skemmstu. Á fundinum var staðan í Icesave-málinu rædd.

Að sögn Bjarna voru á fundinum kynnt drög að samkomulagi milli flokkanna um vinnuferli fyrir framhaldið. „Það er mikil óvissa sem ríkir í öllu framhaldi málsins, m.a. um vilja erlendu aðilana til þess að setjast aftur niður með okkur og ræða þessa stöðu sem upp er komin. En ég er orðinn vongóður um að okkur takist að setja ramma um það hérna heima fyrir hvernig við myndum vilja standa að þessu svona formlega séð og a.m.k. eitthvað lágmark á efnislegu hliðinni, þ.e.a.s. um hvað við vildum ræða.“

Aðspurður sagði Bjarni ljóst að áfram yrði unnið að undirbúningi fyrir þjóðaratkvæðagreiðsluna.

Í samtali við mbl.is sagði Sigmundur Davíð Gunnlaugsson, formaður Framsóknarflokksins, framkomna tillögu ríkisstjórnarinnar svipa mjög til þeirrar tillögu sem hann hafi sjálfur lagt fram 30. desember þegar greidd voru atkvæði um Icesave-lögin á þingi. Spurður hvað sé eins segir Sigmundur það snúast um hvernig menn nálgist nýjar viðræður, að því gefnu að Bretar og Hollendingar fallist á nýjar viðræður.

„Ég eins og stjórnarandstaðan öll tók vel í þetta. Auðvitað eru þetta bara drög þannig að það á eftir að fara yfir smáatriðin, en það er engin ástæða til að ætla annað en að það náist samstaða um þetta,“ sagði Sigmundur.

Sagði hann lykilatriði hvernig ríkisstjórn Íslands tali út á við. „Ég ítrekaði það sem ég hef nefnt áður að frumforsendan hlýtur að vera sú að ríkisstjórnin segi að við þurfum að gera betur og að samningarnir séu ekki sanngjarnir eins og þeir eru og að við þurfum að ná betri samningum. Á meðan ríkisstjórnin segir að þetta sé besta hugsanlega niðurstaðan þá fara Bretar og Hollendingar ekki að gera ágreining um það,“ sagði Sigmundur.

Í kvöldfréttum Ríkissjónvarpsins var haft eftir Steingrími J. Sigfússyni, fjármálaráðherra, að fundurinn hafi verið góður og ráðgert væri að funda aftur á morgun. Sagði hann að rætt hefði verið á fundinum hvernig menn gætu tekið næstu skref í málinu og þróað samtöl og samstarf í málinu.

Fundinn sátu Jóhanna Sigurðardóttir, forsætisráðherra, Össur Skarphéðinsson, utanríkisráðherra, Steingrímur J. Sigfússon, fjármálaráðherra, Bjarni Benediktsson, formaður Sjálfstæðisflokks, Sigmundur Davíð Gunnlaugsson, formaður Framsóknarflokks, Birgitta Jónsdóttir, formaður þinghóps Hreyfingarinnar og Þráinn Bertelsson, óháður þingmaður.