Játaði á sig fjölda innbrota

Karlmaður, sem var handtekinn eftir innbrot í veitingahúsið Kaffi krús á Selfossi um helgina, hefur játað á sig aðild að fjölda innbrota og þjófnaða á Suðurlandi. Hefur maðurinn verið úrskurðaður í 4 vikna gæsluvarðhald að kröfu lögreglunnar á Selfossi. 

Lögreglumenn fengu tilkynningu um það aðfaranótt sunnudag, að þjófavarnakerfi hafi farið í gang á Kaffi krús og fóru þeir strax á staðinn.  Þegar þar kom sást maður á hlaupum frá staðnum.  Ekki dugði honum forskotið og náðist hann fljótlega.  Hann var handtekinn og færður í fangageymslu. 

Lögreglan segir, að við yfirheyrslur á Selfossi hafi maðurinn viðurkennt aðild að mörgum innbrotum á Selfossi, Hvolsvelli og víðar, þjófnaði á díselolíu, sölu og dreifingu fíkniefna framleiðslu, sölu á landa og tvær líkamsárásir. 

Þessi sami maður var handtekinn fyrir skömmu vegna innbrots í fyrirtæki á Selfossi.  Vegna síbrota mannsins gerði lögreglustjórinn á Selfossi kröfu um að hann yrði úrskurðaður í gæsluvarðhald í fjórar vikur.  Dómari varð við því. 

Lögreglan segir, að tíminn verði vel nýttur til að ljúka rannsókn og sé áætlað að ákærur liggi fyrir í þessari viku.  Þar sem maðurinn sé af erlendu bergi brotinn verði farið fram á að Útlendingastofa vísi honum frá landi.

Dagbók lögreglunnar á Selfossi

• 2 blogg um fréttina

Bloggað um fréttina

• Jón Snæbjörnsson: af erlendu bergi brotinn
• Vilhjálmur C Bjarnason: Heppinn ! ! !