Líst afar illa á niðurskurð á svæðisstöðvum

Halldóri Halldórssyni, bæjarstjóra Ísafjarðarbæjar, líst afar illa á niðurskurðinn á svæðisútvarpinu á Vestfjörðum og í öðrum landshlutum. Enginn fréttamaður verður á Ísafirði, a.m.k. ekki í bili, skv. upplýsingum frá RÚV.

Þorvaldur Jóhannsson, framkvæmdastjóri Samtaka sveitarfélaga á Austurlandi (SSA), telur að með þessu sé verið að koma í bakið á Austfirðingum.

Halldór benti á að Ríkisútvarpið væri útvarp allra landsmanna og fjármagnað með sköttum allra landsmanna og því væri eðlilegt að gera þá kröfu að RÚV væri með starfsemi úti um allt land.

Þorvaldur Jóhannsson, framkvæmdastjóri SSA, sagði einsýnt að sveitarstjórnarmenn á Austurlandi, myndu mótmæla niðurskurðinum en þar var öðrum af tveimur fréttamönnum sagt upp. „Okkur hafði verið lofað því að þessum svæðisstöðvum yrði viðhaldið,“ sagði hann.