Þið stappið í okkur stálinu

„Þið stappið í okkur stálinu og okkur veitir ekki af því," sagði Jóhanna Sigurðardóttir, forsætisráðherra, þegar hún ávarpaði íslenska handboltalandsliðið í Laugardalshöll nú undir kvöld. Afhenti hún Handknattleikssambandi Íslands 10 milljóna króna viðurkenningu frá ríkisstjórninni.

Guðmundur Guðmundsson, þjálfari, þakkaði mótttökurnar og sagði að liðið hefði stundum lent í mótbyr en alltaf komið sterkt til baka. Þótt blásið hafi á móti þjóðinni upp á síðkastið hefði hann trú á að hún komi sterk til baka. „Við eigum að vera stolt af því að vera Íslendingar," sagði hann. 

Lögreglan áætlar að um 1000 manns séu samankomnir í Laugardalshöll til að taka á móti landsliðinu.