Samið um Slysavarnaskóla

Nýr þjónustusamningur samgöngu- og sveitarstjórnarráðuneytisins og Slysavarnafélagsins Landsbjargar, um rekstur Slysavarnaskóla sjómanna, hefur verið undirritaður. Samningurinn er til þriggja ára og hljóðar upp á 61,2 milljón króna á ári. 

Kristján L. Möller, samgöngu- og sveitarstjórnarráðherra, og Kristinn Ólafsson, framkvæmdastjóri Slysavarnafélagsins Landsbjargar, skrifuðu undir samninginn. Fulltrúar Siglingastofnunar og fjármálaráðuneytis staðfestu hann einnig, samkvæmt frétt Slysavarnafélagsins Landsbjargar.

Hlutverk Slysavarnaskóla sjómanna er að auka „öryggi sjómanna með fræðslu og þjálfun í meðferð björgunar- og öryggisbúnaðar og almennri fræðslu um slysavarnir á sjó. Skal skólinn halda námskeið fyrir starfandi og verðandi sjómenn á helstu útgerðarstöðum landsins og annast öryggis- og slysavarnafræðslu fyrir nemendur í skipstjórnar og vélstjórnarnámi.“

• 1 blogg um fréttina

Bloggað um fréttina

• Árni Davíðsson: Gott dæmi um það sem vel er gert