Innlent | mbl | 7.2.2010 | 10:20

Spara með íslensku hugviti

Tide Buss rekur 1300 rútur á Norðurlöndunum.

Eitt stærsta rútufyrirtæki Norðurlanda, Tide Buss, hefur keypt íslenska flotastýringakerfið SAGAsystem og telur sig geta notað það til að spara eldsneytiskostnað og stuðla að þýðari akstri.

Íslenska flotastýringarkerfið SAGAsystem hefur verið selt í tæplega eitthundrað nýja strætisvagna sem Tide Buss í notkun í Noregi nú í upphafi árs.

Samningar eru í undirbúningi um að selja SAGA kerfið í alla 1300 farþegabíla fyrirtækisins í Noregi og Danmörku en slíkt myndi nærri tvöfalda veltu þessa íslenska hátæknifyrirtækis.

Norska fyrirtækið Tide Buss hefur leitað logandi ljósi að flotastýringarkerfi síðastliðin misseri og prófað fjölda slíkra kerfa í heilt ár. Niðurstaða fyrirtækisins er að íslenska kerfið skilar miklum eldsneytissparnaði og jafnframt umhverfisvænni og þægilegri akstri fyrir farþega, segir í fréttatilkynningu frá SAGAsystem ehf.

Fylgist með akstri og og staðsetningu

Þá gerir það stjórnendum kleift að fylgjast nákvæmlega með akstri og staðsetningu allra bíla fyrirtækisins auk þess sem það er talið notendavænna en önnur sambærileg kerfi á alþjóðamarkaði.

Kerfið fylgist nákvæmlega með notkun og aksturslagi hvers bíls. GPS-tengdir ökuritar um borð í bílunum nema inngjafir, hraðakstur, hemlanir, álag í beygjum, lausagang og annað aksturslag sem veldur óþarfa rekstrar- og viðhaldskostnaði og eykur tjónahættu.

Þessar upplýsingar eru skráðar á einnar sekúndu fresti og sendar þráðlaust um GSM símkerfið til stjórnstöðvar SAGAsystem á Íslandi. Notendur sjá upplýsingarnar á netinu og nota þær meðal annars til að þjálfa bílstjóra í vistakstri og spara þannig stórfé.

Tvöfaldar veltu SAGAsystem

Áralöng reynsla yfir hundrað og fimmtíu fyrirtækja sýnir að notkun á SAGAsystem dregur úr eldsneytis- og viðhaldskostnaði um 5-15%, lækkar tjónatíðni og þar með tryggingaiðgjöld.

Haft er eftir Sigurdór Sigurðssyni, framkvæmdastjóra rútufyrirtækisins Allrahanda sem rekur fimmtíu fólksflutningabíla á Íslandi, að það spari hátt í tuttugu milljónir á ári í olíu- og viðhaldskostnaði með notkun kerfisins. „Mestu verðmætin eru samt þau að ökuferðin verður þýðari og um leið ánægjulegri fyrir viðskiptavini.”

Samstarf við erlent stórfyrirtæki eins og Tide Buss fer nærri því að tvöfalda veltu SAGAsystem næstu misserin og er að sögn Þórólfs Gunnarssonar framkvæmdastjóra mesta viðurkenning sem kerfið hefur fengið á alþjóðlegum markaði.

Þessi samningur hefur þegar opnað fjölda viðskiptatækifæra utan Íslands.