Innlent | mbl | 12.2.2010 | 13:55

400 milljarða fjárfesting fram til 2017

Bygging álvers í Helguvík er stærsta einstaka framkvæmdin sem gert er ráð fyrir að ráðast í. Rax / Ragnar Axelsson

Að mati iðnaðarráðuneytisins má áætla að fjárfestingar sem tengjast orkufrekum iðnaði og raforkukerfinu verði um 400 milljarðar til ársins 2017, þar af um 265 milljarðar í ár og næstu þrjú ár. Ráðuneytið gerir ekki ráð fyrir álveri á Bakka í þessum tölum.

Í fréttatilkynningu frá ráðuneytinu segir að áhrif þessara framkvæmda á þróun efnahagsmála verði mikil. „Þá skiptir einnig máli að sú verðmæta sérþekking á rannsóknum og nýtingu endurnýjanlegra orkugjafa sem byggð hefur verið upp hér á landi á undanförnum áratugum er hjá stóru verkfræðistofunum og fyrirtækjum á borð við Jarðboranir og Íslenskar orkurannsóknir. Þessi mikilvægu fyrirtæki hafa brugðist við samdrætti með því að leita verkefna erlendis en hætta er á að ef lítil sem engin verkefni verða á þessu sviði hér innanlands á næstu árum þá hverfi þessi þekking og þar með samkeppnisforskot Íslands, úr landi.“

Óvissa og erfiðar aðstæður til fjármögnunar hafa tafið ákvarðanir.

Verkefnin sem um ræðir eru aukning á afkastagetu álvers Rio Tinto Alcan í Straumsvík og bygging Búðarhálsvirkjunar (80MW) á vegum Landsvirkjunar, bygging álvers Norðuráls í Helguvík, stækkun Hellisheiðarvirkjunar (90 MW) og bygging jarðvarmavirkjana í Hverahlíð (90 MW) og við Gráuhnjúka (45 MW)á vegum Orkuveitu Reykjavíkur, virkjanir á vegum HS Orku (Stækkur Reykjanersvirkjunar 80 MW, Eldvörp 50 MW og 1. áfangi í Krísuvík 50 MW), Suðvesturlínur á vegum Landsnets og ýmsar framkvæmdir á vegum Rarik og Jarðborana. Jarðboranir hf hafa nú þegar borað fyrir u.þ.b. 90 MW af þeirri raforku sem þarf til álversins í Helguvík.

Í tölum um ársverk sem til verða er gert ráð fyrir vinnu verkfræðistofa og hönnuða en ekki er reiknað með afleiddum störfum svo áhrifin af fjárfestingunni á vinnumarkað eru mun meiri en fram kemur í tölunum hér á eftir. Á meðan byggingaframkvæmdum stendur má reikna með að afleidd störf séu um það bil eitt starf til viðbótar þeim störfum sem koma beint að framkvæmdunum. Þegar rekstur er hafinn er reiknað með tveim afleiddum störfum á hvert starf í væntanlegu iðjuveri.

Samtals er gert ráð fyrir að fjárfesting í orkumannvirkjum nemi tæplega 160 milljörðum króna fram til 2017, þar af rúmir 126 milljarðar á þessu ári og næstu þremur árum. Ársverk við þessar framkvæmdir eru áætluð samtals um 4.700 til 2017, þar af tæplega 3.800 á þessu ári og næstu þremur árum. Við það bætast svo afleidd störf. Samtals er gert ráð fyrir að fjárfesting í iðjuverunum nemi um 238 milljörðum til ársins 2017, þar af kr. 138 milljarðar á næsta ári og næstu þremur árum. Ársverk við þessar framkvæmdir verða samtals tæplega 7.900 til ársins 2017, þar af rúmlega 4000 ársverk á næsta ári og næstu þremur árum. Við bætast svo afleidd störf.

Framkvæmdir við fyrirhugað álver í Helguvík eru bæði dýrasta og mannaflsfrekasta framkvæmdin og stendur ein og sér undir um 100 milljarðar fjárfestingu í ár og næstu þremur árum og um 3.200 ársverk á sama tíma auk afleiddra starfa. Uppbygging Landsnets á raforkukerfinu er áætluð um 22 milljarðar til ársins 2013 og um 350 ársverk á sama tíma auk afleiddra starfa.

Í samantekt ráðuneytisins er einnig minnt á áform Vern Holdin um að byggja gagnver á Suðurnesjum, en áætlað er að um 270 störf verði til tengd uppbyggingunni og um 250 störf tengd rekstri gagnaversins. Einnig er getið um að viðræður standi við lífeyrissjóðina um aðkomu að fjárfestingaverkefnum.