Launamunur kynjanna minnkar

Árið 2000 voru konur með 24,8% lægra reglulegt tímakaup en karlar en munurinn var kominn í 15,9% árið 2007. Ef horft er til heildartímakaups voru konur með 24,9% lægri laun en karlar árið 2000 en árið 2007 var munurinn kominn niður í 18,5% samkvæmt mælingum Hagstofunnar.

Um er að ræða niðurstöður rannsóknar, sem byggja á gagnasöfnum Hagstofunnar og var gerð í kjölfar samkomulags á milli Alþýðusambands Íslands, Samtaka atvinnulífsins og Hagstofu Íslands í tengslum við kjarasamninga aðila vinnumarkaðarins í febrúar 2008. Niðurstöður byggjast á tæplega 185 þúsund athugunum á launum einstaklinga sem störfuðu á almennum vinnumarkaði á árunum 2000–2007.

Fram kemur, að á árunum 2000–2007 voru konur með lægri laun en karlar en hlutfallslegur launamunur hefur lækkað á tímabilinu. Segir Hagstofan, að þegar valdir skýringarþættir hafi verið leiðréttir með aðferðum tölfræðinnar mælist launamunur á bilinu 9,2–10,3% fyrir tímabilið 2000–2007.

Þegar sundurliðun á launamun sé beitt á þær niðurstöður standi eftir 7,3% óútskýrður launamunur fyrir sömu ár en þá hefur verið tekið tillit til þeirra þátta sem notaðir eru til skýringa á launamun kynjanna. Segir Hagstofan, að þótt niðurstöðum úr greiningum sem fjalla um leiðréttan launamun beri að taka með fyrirvara bendi þær allar til þess að það halli á laun kvenna í samanburði við laun karla.

Einnig voru skoðuð áhrif ólíkra skýringarþátta fyrir konur og karla hvert í sínu lagi. Þá komí ljós að öflun háskólaprófs hafði meiri áhrif til hækkunar á laun karla en laun kvenna. Þá hafði fjöldi barna á heimili jákvæð áhrif á laun karla en neikvæð áhrif á laun kvenna, og því yngri sem börnin eru þeim mun neikvæðari áhrif höfðu þau á reglulegt tímakaup kvenna.

Skýrslan í heild

• 1 blogg um fréttina

Bloggað um fréttina

• Ragnar Birkir Bjarkarson: Árið er 2010