Innlent | mbl | 23.2.2010 | 19:34

Segir viðmót viðskiptavina Haga annað

Jóhannes Jónsson Skapti Hallgrímsson

Jóhannes Jónsson, starfandi stjórnarformaður Haga, segir niðurstöðu skoðanakönnunar MMR, þar sem yfir 80% aðspurðra vill ekki að Jóhannes fái að kaupa allt að 10% hlut í Högum af Arion Banka, vera annað viðmót heldur hann finnur í verslunum Haga.

„Skoðanakönnun sú, sem lesa má í netmiðlum í dag, þar sem lýst er að 80,1% aðspurðra séu frekar eða mjög andvíg því að ég, Jóhannes Jónsson, starfandi stjórnarformaður Haga, fái að kaupa allt að 10% hlut í Högum af Arion banka, er vægast sagt annað viðmót en ég finn fyrir í verslunum Haga.

Það virðist vera almennur misskilningur að ég eignist 10% hlut í fyrirtækinu, þegar það fer á markað í Kauphöll Íslands. Það rétta er, að mér býðst að kaupa 10% hlut á sama verði og öðrum fjárfestum.

Ég er þakklátur fyrir þann stuðning, sem ég fæ úr öllum áttum frá fjölmörgum viðskiptavinum Haga, fólki sem kemur að máli við mig eða sendir mér línu. Ég mun halda áfram að vinna að hag fólks í landinu með lágu vöruverði, hér eftir sem hingað til," segir í fréttatilkynningu frá Jóhannesi Jónssyni.