Eimskip líklega áfram með Herjólf

Vegagerðin stefnir að því að framlengja  samning við Eimskip um rekstur Herjólfs til fyrsta september á næsta ári, að því fréttavefur Eyjafrétta greinir frá. Bæjarstjórn Vestmannaeyja hafði lýst áhuga á að taka við rekstri skipsins þegar siglingar hefjast milli Vestmannaeyja og Landeyjahafnar 1. júlí í sumar.

Í samningsdrögunum við Eimskip segir að hækki hafnargjöld í Vestmanna­eyjum hækki­ gjaldskrá Herjólfs um leið. Bæjarráð Vestmannaeyja kveðst ekki geta samþykkt þær forsendur sem samningur Eim­skipa og samgönguyfirvalda gerir ráð fyrir. Í nýlegri bókun bæjarráðsins segir m.a.:

„Vestmannaeyjahöfn mun ekki axla ábyrgð á gjaldskrá Eimskipa og Vegagerðarinnar og mun gjald­heimta hafnarinnar eiga við um Herjólf eins og aðra þjónustuþega hennar.“

Stefnt er að því að fjölga ferðum ferjunnar á hverjum degi eftir að siglingar hefjast í Landeyjahöfn. Samkvæmt samningsdrögunum á því að velta hærri hafnargjöldum, vegna fleiri ferða yfir á farþegana. 

Þá munu bæjaryfirvöld í Eyjum hafa viljað að skipið sigldi fleiri ferðir á hverju ári en gert er ráð fyrir í samningsdrögunum milli Eimskips og Vegagerðarinnar.

• 1 blogg um fréttina

Bloggað um fréttina

• Jónatan Karlsson: Undarlegt