Vilja auknar aflaheimildir

Talsmenn Fiskmarkaðs Íslands, Fiskmarkaðs Suðurnesja og Reiknistofu fiskmarkaða skora á Jón Bjarnason sjávarútvegsráðherra að auka aflaheimildir í þorski, ýsu, ufsa,karfa, keilu og löngu. Þeir telja að aflabrögð og útreikningar Hafró sýni að engin hætta sé tekin þótt aflaheimildir verði auknar verulega.

Yfirlýsing fiskmarkaðanna og reiknistofunnar birtast á heimasíðu þeirrar síðarnefndu. Þar segir m.a.:

„Með stórfelldum niðurskurði á aflaheimildum s.l. haust er vegið að grundvallar starfssemi fiskmarkaða í landinu. Afleiðingar þessa mikla niðurskurðar eru tvennskonar hvað varðar framboð á fiskmörkuðum.

Margar útgerðir eru nú í byrjun marsmánaðar að stöðvast og einnig hefur niðurskurðurinn þær afleiðingar að nánast ekkert framboð er á leigumarkaði með aflaheimildir.

Fjöldi fiskvinnslufyrirtækja sem byggja vinnslu á hráefnisöflun með kaupum á íslenskum fiskmörkuðum eru nú í mjög alvarlegri stöðu og sjá í raun ekki fram á annað en fjöldauppsagnir fiskvinnslufólks. Slíkt mun hafa alvarlegar afleiðingar á mörkuðum okkar erlendis með íslenskar sjávarafurðir.

Niðurskurður aflaheimilda og algjört frost á leigumarkaði hefur hvað mest áhrif á þær útgerðir sem staðið hafa undir stöðugu framboði á íslenskum fiskmörkuðum.“

• 2 blogg um fréttina

Bloggað um fréttina

• Haraldur Haraldsson: Vilja auknar aflaheimildir/að sjalfsögðu verðum við að gera þetta,annað ekki …
• Níels A. Ársælsson.: Allan fisk á markað og aðskilnað veiða og vinnslu